زيمبابۆەدە شىركەۋ مۇشەلەرىن تاسىمالداعان مارشرۋتتىق تاكسي مەن جۇك كولىگىنىڭ سوقتىعىسۋىنان 27 ادام قازا تاپتى. بۇل تۋرالى پوليسيا وكىلى حابارلادى، دەپ مالىمدەيدى infohub.kz.
پوليسيا وكىلى پول ءنياتيدىڭ ايتۋىنشا، جۇما كۇنى تۇندە استانا حارارەدەن 132 شاقىرىم (82 ميل) وڭتۇستىككە قاراي ورنالاسقان چيۆحۋ قالاسىنىڭ ماڭىنداعى ءىرى تاس جولدا اق كيىمدى جەرگىلىكتى افريكالىق حريستيان ءدىني ۇيىمىنىڭ مۇشەلەرىن كونفەرەنسياعا اپارعان مارشرۋتتىق تاكسي باسقا كولىكتى باسىپ وزۋعا تىرىسقان جۇك كولىگىمەن بەتپە-بەت سوقتىعىسقان.
مەملەكەتتىك تەلەراديوكومپانيا ZBC پروۆينسيالىق ۇكىمەت مينيسترىنە سىلتەمە جاساپ، 23 ادام وقيعا ورنىندا قازا تاپقانىن، ال قالعاندارى جەرگىلىكتى اۋرۋحاناعا جەتكىزىلگەننەن كەيىن جاراقاتتارىنان كوز جۇمعانىن حابارلادى. جەرگىلىكتى ب ا ق مارشرۋتتىق تاكسيدىڭ جالىنعا ورانىپ، كۇيىپ كەتكەنىن كورسەتەتىن سۋرەتتەردى جاريالادى.
نياتي ەكى كولىكتە دە بەلگىسىز سانى جولاۋشى بولعانىن ايتتى. زيمبابۆەدە ادام تولعان اۆتوبۋستار مەن مارشرۋتتىق تاكسيلەر قاتىسقان جول اپاتتارى ءجيى كەزدەسەدى جانە ولار كوبىنەسە ءقاۋىپتى جۇرگىزۋ مەن جولدىڭ ناشار جاعدايىنا بايلانىستى بولادى.
زيمبابۆە — جول قاۋىپسىزدىگى ەڭ ناشار ەلدەردىڭ ءبىرى، بيلىكتىڭ مالىمەتىنشە، اپاتتاردىڭ 94% ادام فاكتورىنان بولادى. بۇۇ افريكا ەكونوميكالىق كوميسسياسىنىڭ دەرەگىنشە، افريكادا جىل سايىن جول اپاتتارىنان شامامەن 300 مىڭ ادام قازا تابادى، بۇل الەمدىك كورسەتكىشتىڭ تورتتەن ءبىرىن قۇرايدى، ال قۇرلىقتا الەمدەگى كولىكتەردىڭ نەبارى 3% عانا بار.