زيمبابۆەدەگى كاريبا كولىندە سەيسەنبىدە ارتىق جۇك تيەلگەن پاروم اۋدارىلىپ، كەم دەگەندە 15 ادام قازا تاۋىپ، 27 ادام حابارسىز كەتتى. بۇل تۋرالى ەلدىڭ توتەنشە جاعدايلار جونىندەگى ۇلتتىق باسقارماسى حابارلادى. ۆەدومستۆونىڭ مالىمەتىنشە، 77 ادام قۇتقارىلىپ، كولدەگى ءبىر ارالعا جەتكىزىلگەن.
زيمبابۆەنىڭ ازاماتتىق قورعانىس قىزمەتى ساتىلعان بيلەتتەر بويىنشا پارومدا 114 ەرەسەك جولاۋشى مەن 5 ەكيپاج مۇشەسى بولعانىن راستاي الاتىنىن، الايدا بيلەت تالاپ ەتىلمەيتىن جاستاعى بالالاردىڭ ناقتى سانى بەلگىسىز ەكەنىن ايتتى. پارومنىڭ سىيىمدىلىعى 90 ادامعا ارنالعان.
جەرگىلىكتى پارلامەنت دەپۋتاتى مۋسا مۋرومبەدزي ءوزىنىڭ الەۋمەتتىك جەلىدەگى پاراقشاسىندا جاعاداعى ادامداردىڭ ەسكىرگەن پارومدى جولعا شىعارىپ سالىپ جاتقانىن كورسەتەتىن ۆيدەو جاريالادى. ونىڭ ايتۋىنشا، اۋىل تۇرعىندارى بۇل پارومدى كول بويىمەن كاريبا قالاسىنا بارۋ ءۇشىن پايدالانادى. ۆيدەودا جاعاداعى كەيبىر ادامدار پارومنىڭ كولدەگى قاتتى تولقىندارعا توتەپ بەرە الاتىنىنا الاڭداۋشىلىق بىلدىرگەن.
بۇعان دەيىن زيمبابۆە پوليسياسى قۇتقارۋ وپەراسياسى ءجۇرىپ جاتقانىن حابارلاعان، ءبىراق ەشقانداي قوسىمشا مالىمەت بەرمەگەن. زيمبابۆەنىڭ مەملەكەتتىك تەلەارناسى ZBC تىكۇشاق اينالىپ جۇرگەن كەزدە جىلدام جۇزەتىن كاتەرلەردىڭ كولدەگى اۋدارىلعان قايىققا قاراي بەت العانىن كورسەتەتىن ۆيدەو جاريالادى.
وڭتۇستىك افريكاداعى كاريبا كولى زيمبابۆە مەن كورشىلەس زامبيا اراسىنداعى شەكارانىڭ ءبىر بولىگىن قۇرايدى. بۇل الەمدەگى كولەمى بويىنشا ەڭ ۇلكەن جاساندى كول. ول 1950 جىلداردىڭ سوڭى مەن 1960 جىلداردىڭ باسىندا زامبەزي وزەنىنە بوگەت سالۋ ارقىلى پايدا بولعان. ناتيجەسىندە اڭعار بىرتىندەپ سۋعا تولىپ، قازىرگى كەزدە ۇزىندىعى 200 شاقىرىمنان اساتىن، كەي جەرلەرىندە ەنى 40 شاقىرىمعا جەتەتىن ۇلكەن كولگە اينالعان. زيمبابۆە مەن زامبيا بۇل كولدى ورتاق پايدالانادى، رەسمي شەكارا كولدىڭ ورتاسىمەن وتەدى.