باتىس قازاقستان وبلىسىندا قارجىلىق مونيتورينگ اگەنتتىگىنىڭ قىزمەتكەرلەرى استىقتىڭ «سۇر» يمپورتىنىڭ سحەماسىن اشكەرەلەدى: ءونىم شەتەلدەن اكەلىنىپ، قازاقستاندىق شارۋا قوجالىقتارىنىڭ ءونىمى رەتىندە كورسەتىلگەن. بۇل تۋرالى infohub.kz سايتى حابارلايدى.
تەرگەۋ نۇسقاسى بويىنشا، قىلمىسكەرلەر جالپى قۇنى 11،2 ملرد تەڭگە بولاتىن شامامەن 130 مىڭ توننا يمپورتتىق استىقتى زاڭسىز اكەلگەن. بوتەن تاۋاردى زاڭداستىرىپ، ونى قازاقستاندا وندىرىلگەن دەپ كورسەتۋ ءۇشىن دەلدالدار جالعان كومپانيالار مەن جالعان مامىلەلەر تىزبەگىن قۇرعان. «Bakery Nan»، «KazGrano»، «Perfect Seed»، «Weizen» جانە «Golden Grain Kazakhstan» جشس-تەرى كۇنى بۇرىن سەنىم بىلدىرىلگەن ادامدارعا تىركەلگەن.
وتاندىق فەرمەرلىك قوجالىقتارمەن جالعان ساتىپ الۋ-ساتۋ شارتتارى جاسالعان. بۇل يمپورتتىق استىققا قازاقستاندىق قۇجاتتاردى راسىمدەۋگە جانە ونى وزبەكستانعا، اۋعانستانعا جانە تاجىكستانعا كەدەرگىسىز ەكسپورتتاۋعا مۇمكىندىك بەرگەن.
تاۋاردىڭ شىعۋ تەگى تۋرالى قۇجاتتارمەن ايلا-شارعى جاساۋدىڭ باستى ماقساتى – جەڭىلدىكتى ىشكى تەمىرجول ءتاريفىن الۋ بولعان. قازاقستاندىق استىقتى ەل اۋماعىمەن تاسىمالداۋ حالىقارالىق ترانزيتكە قاراعاندا الدەقايدا ارزان. ناتيجەسىندە يمپورتتى جەرگىلىكتى ءونىم رەتىندە كورسەتۋ سالدارىنان «قتج – جۇك تاسىمالى» كومپانياسى 1 ملرد تەڭگەدەن استام ترانزيتتىك تاريفتەن قاعىلعان.
سونىمەن قاتار، فيگۋرانتتار اقشانى وزدەرىمەن بايلانىستى شوتتارعا شىعارىپ، سالىق تولەمەۋ ءۇشىن بانكروتتىق راسىمدەرىن ادەيى باستاعان. مەملەكەتكە كەلتىرىلگەن جالپى شىعىن 1،2 ملرد تەڭگەنى قۇرادى. ءىس بويىنشا بەس ادام كۇدىكتى دەپ تانىلدى، تەرگەۋ اياقتالىپ، سوتقا جىبەرىلۋدە.
بۇعان دەيىن قازاقستاننىڭ سولتۇستىك جانە ورتالىق وبلىستارىنداعى قۋاڭشىلىق استىق ونىمىنە ءقاۋىپ توندىرگەن بولاتىن.