Abaı marqum ótken soń ózime aıtqan jyrlarym
«Ajal jetse, óldiń be,
Ólim keldi, kórdiń be?
Baıansyzǵa salynba»‚ –
Dese, toqtaý berdiń be?

Jetpesti qýdyń, jettiń be,
Barsha jannan óttiń be?
Taǵdyryń jazǵan aq ólim,
Qutylyp onan kettiń be?

Qarmanyp ediń, taptyń ba,
Qaryndasqa jaqtyń ba?
Qarsylasqan jaýyńdy,
Qanekı, jerge qaqtyń ba?

Bildim dediń, ne bildiń,
Basyńa paıda ne qyldyń?
Bári de boldy baıansyz,
Ózińnen-óziń jeńildiń.

Ólmesteı ony kórýshi eń,
Soǵan da qarsy kelýshi eń.
Aıaǵan sonan janyńdy
Kimge saqtap berýshi eń?!

Óziń kimnen kem ediń,
Kim úshin ýaıym jep ediń?
Kúderińdi úzdiń be‚
Súıenishim myqty dep ediń?

Qanekı, qaıtyp keldi me,
Janyńa járdem berdi me?
Jalańdaǵan jalmaýyz,
Jan-jaǵyńnan kórdi me?

Tıanaq kórme jalǵandy,
Qýa berme armandy.
Paıǵambar men sahaba,
Sen túgil sodan qalǵan-dy.

Qutyrmaı endi tek otyr,
Kúnáńa ýaıym jep otyr.
Aldyńda kirer úıiń bar,
«A, toba, ońda»,– dep otyr.

Esiń barda eliń tap,
Barǵanda kirer jeriń tap.
Jaratqannyń qulysyń,
Jaǵatuǵyn ebiń tap.

El minezin bildiń ǵoı,
Talaı-aq birge júrdiń ǵoı.
Itpen birge ıt bolyp,
Kúnásyna kirdiń ǵoı.

Endi esińdi jısańshy,
Manar taýǵa syısańshy.
Alasuryp aptyqpaı,
Bul jalǵandy qısańshy.

Nemeneni qımaısyń,
Nápsini nege tyımaısyń?
Ózińdi kimge syılatyp,
Óziń kimdi syılaısyń?

Jan aıaspas kisiń joq,
Armanda qalar isiń joq.
Endi júrer jalǵanda,
Qarasam, sende pishin joq.

Jalǵandy talaq qylypsyń,
Bas-aıaǵyn bilipsiń.
Esi shyqqan kisideı,
Qur sandalyp júripsiń.

Jalyndamaı sóne qal,
Alla isine kóne qal.
Báriniń dámin tattyń ǵoı,
Ý ishkendeı óle qal!

Tamam jandy bılemek,
Jalǵyz óziń sóılemek...
Munyń túbi ne bolar,
Ymitiń boldy ne demek?

Dosty myqty qylmaqsyń,
Duspanyńdy qyrmaqsyń.
Aıaǵynda sen de bir
Kishirek qudaı bolmaqsyń.

Jýannyń oıy osy ǵoı,
Bul minezden shoshy, qoı.
Shyǵa almassyń yrǵalyp,
Ol qaırattyń bosy ǵoı.

Shyn dosyń saǵan ne berdi,
Sońyńnan seniń nege erdi?
«Aram da bolsam‚ aqtasyn,
Kúnáma kerek»‚ – dep erdi.

Esh nárseńdi almaıdy,
Jumysy kelse, jaldaıdy.
Kúı, otqa tús, sýǵa tús,
Aram da bolsań‚ qalmaıdy.

Shyn joldasyń osy ma,
Osylar jannyń dosy ma?
Aq isińe adam jaq,
Adamnan tipti shoshyma!

Týysqan men jaqynyń –
Olarǵa tolsa taqymyń,
«Tatý júr» dep zarlaǵan
Alynyp pa edi aqylyń?

Adaldyq aıtyp jeńdi me,
Nemese sózge kóndi me?
Neshe jyldaı uqqan joq,
Aqyly jańa endi me?

Bolmasqa bulaı qara ter,
Aldyńǵy jaqty qamdaı ber.
Jaqynyńnan jaý jaqsy,
Eń jaqynyń – qara jer.

Duspanyń anaý, el mynaý,
Oılasańshy, ıapyr-aý.
Adam bolyp týyp eń,
Aqylyń qaıda, batyr-ay?

Qury bilgen ne kerek,
Bilgendi qylǵan, so kerek.
Baıansyzdyń bárin qoı,
Bolasyń sonda shyn zerek.

Janyńa qyzyq jalǵanda,
Nemeneń qaldy armanda.
Bul jalǵannan ne serik,
Táńiri aldyna barǵanda.

Lapyldadyń, jandyń ǵoı,
Tilegińdi aldyń ǵoı.
Sý eken dep ý iship,
Janyń jaı bop qandyń ǵoı.

Izdegeniń maqtan ǵoı,
Dalaqtap kúnde shapqan ǵoı.
Ne kún týdy basyńa,
Teginde, jyn qaqqan ǵoı.

Jyn qaqpasa‚ munyń ne,
Shynymen qor boldym de.
Esińdi jı, erte oılan,
Qaza keldi – óldim de.

Bir ólgen soń jaý da joq,
Aldyńa keler daý da joq.
Bul jalǵannan ketken soń,
Partıa satqan saýda joq.

Qalǵandar júrsin qaǵynyp,
Qaıtesiń ony saǵynyp.
Tepkilesin molańdy,
Jatyrsyń dep ne qylyp?

Onda da saǵan min emes,
Ol musylman dini emes.
«Musylmanbyz» degeni –
Bul qazaqtyń shyny emes.

Haq musylman kim bolar –
Aıtsa sózi shyn bolar.
Rahym, uıat, ar, ynsap –
Tórteýi bolsa, din bolar.

Tórteýiniń biri joq,
Boıynda ıman nury joq.
Qury aıtqanmen bola ma,
Musylmandyq túri joq.


You Might Also Like