![Jalmaýyzdy aldaǵan qyzdar](http://infohub.kz/uploads/thumbnail/20240119214303961_big.jpg)
- 17 naý. 2015 00:00
- 278
Jalmaýyzdy aldaǵan qyzdar
Ertede bir baı bolypty. Baıdyń aýrý áıeli jáne úsh qyzy bar eken. Bir kúni áıeli naýqasynan aıyqpastan qaıtys bolady. Biraz ýaqyttan keıin baı úıine basqa áıel alyp keledi. Bul áıel qatygez adam bolyp shyǵady. Ol baıdyń qyzdaryn jek kóredi. Bir kúni ógeı shesheleri qyzdaryn shaqyryp alyp:
— Shyraqtarym, búgin sender toǵaıdan jemis terińder, – dep túbi tesik shelek beredi. Qyzdar:
— Alaqaı! Jemis teremiz! – dep qýanyp toǵaıǵa ketedi. Toǵaıǵa kelip, jemis tere bastaıdy. Biraq, tergen jemisteri tesik shelekten túsip qala beredi. Sol sebepti qyzdar toǵaıda kóp júrip qalady.
Osy ýaqytta ógeı shesheleri ákesiniń basyn aınaldyryp, basqa jaqqa kóship ketedi. Keshke jaqyn qyzdar ábden sharshap úılerine kelse, úı ornynda joq bolyp shyǵypty. Qyzdar jylap-syqtap úıdiń ornyna túneıdi. Erteńine osy aradan bir aınany, taraqty, ıneni taýyp alady. Osylardy alyp qyzdar jolǵa shyǵady.
Kele jatyp bir julym úıge kezigedi. Osy julym úıde jalmaýyz kempir turady eken. Qyzdar úıge kiredi. Úıdiń ishinde kishkentaı qyz otyr edi.
Qyzdar odan:
— Úıdiń ıesi qaıda? – dep surapty.
Sonda qyz:
— Bul úıdiń ıesi– men jáne meniń sheshem – jalmaýyz kempir, – deıdi.
Qyzdar qorqyp qalady. Biraq basqa amaly bolmaǵandyqtan keshke deıin jalmaýyzdy kútip otyrady. Keshke jalmaýyz úıine kelse, úıde úsh qyz otyr eken. Qyzdardy kórip, ol qýanyp qalady.
— Senderdi maǵan shaıtan aıdap ákelgen shyǵar. Qyzymyz ekeýimiz bir toıatyn boldyq. Al, búginshe jatyp demalyńdar, – dep olarǵa tósek salyp beredi.
Kempir erteńine ań aýlaýǵa ketip bara jatyp, qyzdarǵa:
— Maǵan kishkentaılaryńdy pisirip qoıyndar, túste qaıtyp kelermin, – deıdi.
Jalmaýyz kempir ketken soń, qyzdar kishkentaı qyzdy ózderimen birge alyp qashady.
Kempir kelse, óziniń qyzy da, úıde qalǵan úsh qyz da joq. Qatty ashýlanǵan ol qyzdardy qýa jóneledi.
Bir ýaqytta qyzdar artyna qarasa jalmaýyz kempir jetip qalǵan eken. Jalmaýyz kempirdiń qyzy osy ýaqyttyń ishinde úsh qyzǵa baýyr basyp qalǵan edi.
— Apaılar, meniń sheshem jetip qalǵan kezde, qoldaryńda ne bar sony artqa qaraı laqtyryńdar. Sol kezde onyń aldynan bóget paıda bolady, – dep aqyl aıtady ol.
Qyzdardyń úlkeni kishkentaı qyzdyń sózin estı sala taraqty tastapty. Ol úlken toǵaı bolypty. Ekinshi ret jete bergende ortanshysy ınesin tastaıdy. Ol bıik taý bolypty. Onan da kempir ótedi. Úshinshi ret kishkentaı qyz aınasyn tastaıdy. Ol úlken kól bolady. Jalmaýyz kempir bul kólden óte almaıdy. Ol kóldiń ekinshi jaǵalaýynda turǵan qyzdardan:
— Qyzdar, sender bul kólden qaıtip óttińder? – dep suraıdy.
Qyzdar:
— Moınymyzǵa tas baılap óttik, – deıdi.
Kempir qyzdardyń sózine senip, tas baılap sýǵa túsedi de batyp ketedi. Al, qyzdar aman-esen úıin taýyp, ákesine bolǵan oqıǵany túgel baıandap beredi. Ákesi qyzdaryna jasaǵan zulymdyǵy úshin áıelin qýyp jiberedi. Jalmaýyz kempirdiń qyzyn asyrap alady.
Osylaı qyzdar birge tatý-tátti ómir súredi.