Jasymda ańda júrgen jaqta,
Azattyq ómir súrgen shaqta,
Shattanyp júrdim shalyqtaı,
Ońasha ómir súrgenim-aı!
Elsizde erkin júrgenim-aı!
Qaıǵyrmaı, qajyp qamyqpaı.

Jıyrma jetinshi fevralda
Entelep keldim ıesiz tamǵa,
Jatýǵa jalǵyz jalyqpaı.
İsh aýrý bolyp naýqastanyp,
Úsh sótke udaı ishim janyp,
Qur terim qaldy qabyqtaı.

Tilimde – táýbá, júrekte – ıman,
Tilekti tilep oıǵa syıǵan,
Jalyndym haqqa jabyqpaı.
Imanymdy úzbeı jattadym-aı,
Typyrshyp tynym tappadym-aı!
Qaırańda qalǵan balyqtaı.

Japanda jalǵyz jatqanym-aı!
Aýrýdan azap tartqanym-aı!
Táńirime jaıym málim-aı!
Dármenim qalmaı turýǵa da,
Ot jaǵyp, denem jylýǵa da,
Muzdaı bop qatty-aý tánim-aı!

İshimdi burap, órtetkeni-aı,
Janymdy kózge kórsetkeni-aı,
Azaıyp ketti-aý álim-aı!
Qyryndy menen qan ótkeni-aı,
Álisin áli jáne ótkeni-aı,
Taýsylyp tamyr qanym-aı!

İshegim shanshyp turǵanyn-aı,
Tym qatty shóldep turǵanym-aı,
Sýsynǵa taǵy jarymaı!
Tósekte jatyp qalǵanym-aı,
Turaıyn desem, talǵanym-aı,
Bastyrmaı eki sanym-aı!

Ustaýǵa qoldan ál ketkeni-aı,
Aıaq pen belden jan ketkeni-aı,
Qalmady qýat dánim-aı!
Ólimdi arman kórmedim-aı,
Qınalmaı biraq ólmedim-aı,
Qaıteıin, qaıran janym-aı!

---