Qorqyt, Qoja Hafız túsime endi de...
Qorqyt, Qoja Hafız túsime endi de,
Osy ánine salyp keldi de,
Ol úsh qaıtara muny saıratyp,
Dedi: Kókeıińe endi me?

Bul ánge mynaý jyrdy sal,
Áni men sózin uǵyp al.
Oıyńmen qoshtasar mezgiliń taıaý,
Jyr jazbasań tartar oı
Kúnnen kúnge jalqaýlanyp baıaý.

Qaıran tereń oıym, qartaıyp tozdyń ba?
Erinshek bop buıda sozdyń ba?
Sen barsha adamnan ozam deýshi ediń,
Mynaý kárilikten ozdyń ba?

Osymen toqta jyǵylmaı,
Syımaıtyn jerge tyǵylmaı.
Esti jı, tozdy mı, baıqa da saqtan.
Izdegeniń bolmasa ataq almaq,
Asqandyq pen maqtan.

Oıdyń jaýaby osy bul sózge qaıyrǵan:
Ólim joq qoı ázir aıyrǵan.
Men erinshek bop áli tozǵam joq,
Kemip burynǵy ótken jaıymnan.

Qartaıyp tozǵan boı deneń,
Aırylman ólmeı men senen.
Mıda joq buzyq qan, aqylyń taza,
Ne sebepten bolasyń oıdy buzyp,
Kúder úzip naza?

Oıym, bul sózińe toqtalyp tura alman
Kemshilik bar sende quralǵan.
Sen umytshaq bop, jalqaý tartqansyń,
Qaıtip qutylasyń bulardan?

Moıynda tozǵan minińdi,
Joqtama ótken kúnindi.
Sary sý mıǵa kep aq tamyr jaqtan,
Sala ma dep qorqamyn
Aıaǵyńa ashylmaıtyn qaqpan.

Óziń jas kezińde ár iske alańdap,
Birin maqtap, birin jamandap,
Bul umytshaqty boıǵa jıǵasyń,
Tastap shydamadyq tabandap.

Erinshek, eski joldasym,
Demediń boıda bolmasyn.
Sol ádet júr áli artyńnan qalmaı,
Kárilikke jabasyń,
Art jaǵyńa nazaryńdy salmaı.

Buzyq adamdardy aq jolǵa salýǵa,
Qıanatty kórge jabýǵa,
Men aqyl menen oıdy jumsaýshy em,
Talaı qıyn isti tabýǵa.

Sholǵynshy oıym aqylǵa,
Aqylym toqtap maqulǵa,
Tolǵanyp, synǵa alyp, tanyǵyn tastap,
Anyqtalǵan haqıqat
Týra jolǵa salýshy edi-aý bastap.

Qosh bol, tereń oıym, álemdi sharlaǵan.
Qıyn iske ádeıi arnaǵan.
Bar dene sezim tappas jumbaqtyń
Tolǵap, talaı syryn barlaǵan.

Aqylǵa ákep synatqan,
Durysyn aqyl unatqan.
Qaıran oı, qaıran mı, qoshtastym jylap.
Keshikpeı-aq qalar dep
Oryn qylǵan saýyttaryń qulap.


You Might Also Like

Jańalyqtar

Jarnama