Sap, sap, kóńilim, sap, kóńilim!
Sap, sap, kóńilim, sap, kóńilim!
Saıalamaı, saı tappaı,
Ne kún týdy basyńa
Kúni-túni jaı tappaı?
Sen jaıyńa júrgenmen,
Qyz óle me baı tappaı?
Tún kezgeniń maqul ma,
Jan-jaǵyńa jaltaqtaı?
Ólermin dep júrmisiń,
Munan basqa jan tappaı?

Sap, sap, kóńilim, sap, kóńilim!
Sabyr túbi – sary altyn.
Sabyr qylsyn, jaıyńdy
Biler me eken bekzatym?
Kóńil aýlap, sóz aıtar
Aradaǵy tilhatym,
Aǵyn sýdaı ekpindep,
Laıy joq sýatym,
Aýrý da emes, saý da emes,
Qurydy ál-qýatym.

Sap, sap, kóńilim, sap, kóńilim!
Sana qylma bekerge.
San qylǵanmen paıda joq,
Dúnıe daıar óterge,
Ajal daıar jeterge.
Qosh, qyz alsyn qoınyna,
Beınet kórmeı, dáýlet joq.
Áli batyp keterge,
Onymenen boıyńa
Iman, dáýlet biter me?
Adaldy satsań aramǵa,
Qudaı qabyl eter me?
Qyz súıedi meni dep,
Oǵan kóńil kóterme!

Sap, sap, kóńilim, sap, kóńilim!
Sarqa berme sanasyn.
Bárin óziń bilseń de,
Áli-aq óziń tanasyń.
Órtenesiń, janasyń.
Óz-ózińnen beınetke
Óz basyńdy salasyń.
Qaı mezgilde toıǵyzdyń
Aıýdaıyn aǵasyn,
Qatyny men qalashyn?
Qarsaq jortpas qara adyr,
Qaramaı nege shabasyń?
Sonda táýir bola ma,
Ustap ap bireý sabasyn?
Kıimińdi tonasyn,
Elge de kúlki bolasyń.

Sap, sap, kóńilim, sap, kóńilim!
Saǵynyshqa sarǵaıma!
Jaı júrseń de qyz qýmaı,
Seni bireý qarǵaı ma?
Qyz izdeseń, qalyń ber,
Munym aqyl bolmaı ma?
Kórip alsań kóriktini,
Tańdap alsań tektini,
Sonda da kóńil tolmaı ma?


You Might Also Like

Jańalyqtar

Jarnama