Eı, baýyrym!
Kóterseńshi, kóterseńshi basyńdy.
Alataýdyń asqaryna kúnniń nury shashyldy.
Qyz-tirshilik, mine taǵy moıynyńa asyldy,
Asyldy da saýsaǵymen sıpaǵandaı shashyńdy.
Kóter basty,
Tur ornyńnan!
Terezege qarashy.
Netken tunyq, netken qymbat jer men kóktiń arasy
Netken jaqyn bul ǵalamda adamzattyń balasy!
Baýyrym-aý, jı kúshińdi, terezege qarashy.
Jata berme aýyr dertke, aýyr dertke bas uryp,
...Áne bireý bara jatyr jumysyna asyǵyp.
Avtobýstan qalyp qoıǵan jáne bireý, ashynyp,
Átteń, átteń, aınalaıyn kóńli qaldy-aý basylyp...
Qarashy, áne, ańdap basyp, barady etip qart adam,
Ajary da, nazary da, bazary da tarqaǵan.
Qart adamǵa qarsy kelip, sálem berse qart Ana,
Uzyn-sonar birdeńeni aıtyp jatyr qart oǵan.
Myna jolmen ýaıymsyz áli talaı ótersiń,
Shyǵa almaǵan asýyńa, aman bolsań jetersiń.
Eı, Baýyrym!
Eı, Baýyrym, basyńdy bir kótershi,
Mynaý qyzyq dúnıeni qalaı qıyp ketersiń...

---