InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتىنىڭ جوعارى وقۋ ورنىنا دەيىنگى ءبىلىم بەرۋ فاكۋلتەتىنىڭ شەتەلدىكتەردىڭ تىلدىك جانە جالپى ءبىلىم بەرۋ دايىندىعى كافەدراسىندا شەتەلدىك ستۋدەنتتەرگە ارنالعان «16 جەلتوقسان – تاۋەلسىزدىك كۇنى» اتتى اشىق تاربيەلىك ءىس-شاراسى ءوتتى. بۇل ءىس-شاراعا كافەدرا وقىتۋشىلارى مەن شەتەلدىك ستۋدەنتتەر قاتىستى.

ءىس-شارانىڭ ماقساتى – شەتەلدىك ستۋدەنتتەرگە اتا-بابامىزدىڭ تاۋەلسىزدىك جولىنداعى ەرلىگىن ۇلگى ەتىپ، ەلىمىزدىڭ تاۋەلسىزدىگىن اتاپ ءوتۋ قارساڭىندا ەل تاريحىنا شولۋ جاساۋ.

جيىندا ءسوز العان كافەدرا وقىتۋشىلارى 1991 جىلى 16 جەلتوقساندا «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋسيالىق زاڭى قابىلدانىپ، قازاقستان بۇكىل الەم مويىنداعان، زاڭدى تۇردە راسىمدەلگەن تاۋەلسىز مەملەكەت مارتەبەسىنە يە بولىپ، بۇل زامانالىق وقيعا – حالقىمىزدىڭ ۇرپاقتارىنىڭ ورىندالعان ارمانى مەن ءۇمىتىنىڭ ناتيجەسى ەكەنى تۋرالى مالىمدەمە جاساي وتىرىپ، بۇگىنگى كۇنى قازاقستان تمد ەلدەرى اراسىندا جاڭعىرتۋ مەن دامىتۋدىڭ كوشباسشىسى ەكەنىن ماقتانىشپەن ءسوز ەتتى.

ودان كەيىن كافەدرانىڭ وقىتۋشىلارى كەزەكپەن ءسوز الىپ، تاۋەلسىز ەلىمىزدىڭ جەتكەن جەتىستىكتەرىمەن تانىستىرا وتىرىپ، تاۋەلسىزدىك كۇنى ەلىمىزدىڭ بارلىق ازاماتتارى ءۇشىن ورنى ەرەكشە مەرەكە ەكەنىن، وسىناۋ جۇرەكجاردى قۋانىشقا تولى كۇندى اتا-بابالارىمىز عاسىرلار بويى ارمانداپ، كۇتكەنىن ايتا وتىرىپ، باياندامالارىمەن تانىستىردى.

ستۋدەنتتەر قازاقستان رەسپۋبليكاسى تاۋەلسىزدىگى جونىندە كوپتەگەن سۇراقتار قويدى. سونىمەن قاتار شەتەلدىك ستۋدەنتتەر ءۇش تىلدە قازاقستان رەسپۋبليكاسى تاۋەلسىزدىگى تۋرالى ولەڭدەر وقىدى جانە اتالعان ءىس-شاراعا ارنايى ۇيىمداستىرىلعان شاعىن قويىلىمعا قاتىسا وتىرىپ، قازاق جانە ورىس تىلدەرىن مەڭگەرگەن دەڭگەيلەرىن كورسەتە ءبىلدى.

«16 جەلتوقسان – تاۋەلسىزدىك كۇنى» اتتى اشىق تاربيەلىك ءىس-شارا شەتەلدىك ستۋدەنتتەردىڭ وزدەرىنىڭ بەلسەندى قاتىسۋىمەن جوعارى دەڭگەيدە ءوتتى.

ا. سادەنوۆا
ءال-فارابي اتىنداعى قازۇۋ، جوعارى وقۋ ورنىنا دەيىنگى ءبىلىم بەرۋ فاكۋلتەتى،
شەتەلدىكتەردىڭ تىلدىك جانە جالپى ءبىلىم بەرۋ دايىندىعى كافەدراسى

---