InfoHub Logo

الما كەپتىرۋ ءۇشىن تەك پىسكەندەرى عانا ىرىكتەلەدى. ولار جۋىلىپ، تىلىكتەنەدى. وزەگى الىنىپ تاستالىنادى دا، تازا فانەر ۇستىنە سالىنىپ، كۇن كوزىنە كەپتىرىلەدى.

الما ءتارىزدى المۇرتتى دا كەپتىرىپ الۋعا بولادى.

ورىك كەپتىرۋ. ورىك سۇيەگى الىنىپ تا، سۇيەگى الىنباي دا كەپتىرىلەدى.

وسى ماقساتقا ارنالعان ورىك جۋىلىپ، سۇيەگى الىنىپ تاستالادى. سودان سوڭ سۇيىق ەتىپ ەرىتكەن ليمون قىشقىلىنا 10 مينۋت سالىپ قويىلادى.

ەرىتىندى دايىنداۋ ءۇشىن 1 كەسە سۋعا 2 شاي قاسىق كريستالل تۇرىندەگى قىشقىل سالىنىپ ەرىتىلەدى.

سونىمەن ورىك ەرىتىندىدەن الىنىپ، ەلەككە ءبىر قابات ەتىپ جايىلادى دا، شاڭ تۇسپەيتىن جەرگە قويىپ، كۇن كوزىنە كەپتىرىلەدى. كەشكە قاراي بولمەگە ەنگىزىلەدى.

ءسويتىپ 4 كۇننىڭ ىشىندە ورىك كەۋىپ بولادى. ول ابدەن كەپكەننەن كەيىن 3-4 ەلەكتەگىسى ءبىر ەلەككە اۋدارىلادى دا، كولەڭكەگە قويىلىپ، ابدەن قۇرعاتىلادى.

كەپكەن ورىكتى ۇزاق ساقتاۋ ءۇشىن، ونى شىنى ىدىسقا نەمەسە قاڭىلتىر بانكالارعا سالىپ، اۋزىن جاقسىلاپ جابۋ، سونداي-اق تەمپەراتۋراسى ءبىرقالىپتى ورىندا ساقتاۋ كەرەك.

ءجۇزىم كەپتىرۋ. ءجۇزىم ىرىكتەلىپ جۋىلادى. 2-3 سەكۋند ءسىلتى ەرىتىندىسى شاشىلادى دا، قايتادان سۋىق سۋمەن جۋىلادى. ءسويتىپ تىك فانەر ۇستىنە جايىلادى دا، كولەڭكەدە كەپتىرىلەدى.

كىشكەننەن كەيىن قۇرعاق، قوڭىر سالقىن ورىندا ساقتالادى.

كوك (اسكوك، اشكوك، پەترۋشكا) كەپتىرۋ. وسى ماقساتقا ارنالعان كوك جۋىلادى. فانەر ۇستىنە جۇقالاپ جايىلىپ، كولەڭكە جەردە كەپتىرىلەدى.

كەپكەن كوك قاپشىققا سالىنىپ، قۇرعاق ورىندا ساقتالادى.

پوميدور كەپتىرۋ ءۇشىن پىسكەن، جاراقاتتانباعاندارى عانا تاڭدالىپ الىنادى. جاقسىلاپ جۋىلىپ، ءسولىن جويماس ءۇشىن ەكى نە ءتورت بولىنەدى. سودان سوڭ تازا فانەر ۇستىنە قاتارلاپ قويىلىپ، كەپتىرىلەدى.

كەپكەن پوميدور جىپكە ءتىزىلىپ، قۇرعاق ورىندا ساقتالادى.

قىزىل بۇرىش كەپتىرۋ. مۇنداي بۇرىشتىڭ ءتاتتىسىن دە، اششىسىن دا كەپتىرۋگە بولادى. وسى ماقساتقا ارنالعان بۇرىش جۋىلادى دا فانەر ۇستىنە قاتارلاپ قويىلىپ كەلتىرىلەدى. ءبىراق ونى اۋىق-اۋىق اۋدارىستىرىپ وتىرۋ كەرەك.

كەپكەننەن كەيىن جىپكە ءتىزىپ، قۇرعاق ورىندا ساقتالادى.

---