نەمەرە ماحابباتى (كورىنىس)
(ساحنادا اكەسى، اناسى، قىزى ۇشەۋى ءشاي ءىشىپ وتىرادى)
اكەسى:
— قىزىم، الداعى اپتادا اۋىلعا بارامىز. اتا-اجەڭە كورسەتەتىن ماداقتامالارىڭدى الىپ ال! قۋانىپ قالسىن!
قىزى:
— اكە، ول كىسىلەر جاقسى وقيتىنىمدى بىلەدى عوي؟! ودان دا اتام مەن اجەمنىڭ جاقسى كورەتىن جىلى-جۇمساق، تاتتىلەرىن الا بارايىق تا؟!
اناسى:
— اقىلىڭنان اينالدىم! اتاڭ مەن اجەڭ نەنى جاقسى كورەدى ەكەن؟
قىزى:
— اتام المانى جاقسى كورەدى. اجەم قالامپىر قوسىلعان ساپالى ءۇندى شايىن جاقسى كورەدى. ەكەۋى دە ءتاتتىنى ۇناتادى. اجەم بازاردان مونشاقتارى بار، قىزعىلت كۇرەڭ قامزول كورىپ، قاتتى قىزىققان. الۋعا اقشاسى جەتپەگەن. اتاما ءدۇربى قاجەت.
اكەسى:
— مىنە، ناعىز نەمەرە! اتاسى مەن اجەسىنىڭ التىنى. بۇگىن اناڭ ەكەۋىڭ بازارعا بارىپ، وسى زاتتاردى تۇگەل الىڭدار! اقشانى تەلەفوندارىڭا جىبەرەم. ال، مەن جۇمىسقا كەتتىم. (ىشىنەن باتا جاساپ،ورنىنان تۇرادى)
اناسى:
— جاراتقان جار بولسىن! ءىسىڭ وڭىنان شەشىلسىن!
قىزى:
— اكە، جولىڭىز بولسىن!
اكەسى:
— ءامين! (شىعىپ كەتەدى.)
اناسى:
— قىزىم، اجەڭە تاعى نە نارسەلەر كەرەك؟ ويلانشى...
قىزى:
— اناشىم، اجەمە شومىلدىراتىن، شاشىن تاراپ، ءورىپ بەرەتىن ادام كەرەك. اۋىلدا بارلىعى تاڭ كەتىپ، كەش كەلەدى. قالاعا اكەلىپ الايىقشى..؟! اجەمدى ءوزىم شومىلدىرىپ، شاشىن تاراپ، ءورىپ بەرەيىن؟ اتاما جەمىس قوسىلعان س ۇلى بوتقاسىن جاساپ بەرگەم. قاتتى ۇناتقان. سونى ءجيى جاساپ بەرەر ەدىم..؟!
اناسى:
— قىزىم-اۋ، جالىنساق تا كەلمەي وتىر عوي ول كىسىلەر. قالاي اكەلەمىز؟
قىزى:
— قوناققا شاقىرايىق؟! «از كۇنگە»- دەپ. سوسىن ارالاساتىن ورتا، قىدىراتىن جەر تاۋىپ بەرەمىز. كەيىن وزدەرى قايتقىلارى كەلمەي قالادى.
اناسى:
— مەيىرىمگە تولى جۇرەگىڭنەن اينالدىم! وندا اتاڭ مەن اجەڭدى قىدىرتاتىن جەرلەردىڭ ءتىزىمىن جاسا. ءبىرىنشى قاباتتاعى قوناق بولمەگە ەكى توسەك، تەلەديدار كىرگىزەيىك.
قىزى:
— اناشىم، اتام مەن اجەمە ولەڭ ارنادىم. وقىپ بەرەيىن بە؟
اناسى:
— وي، بارەكەلدى! وقي عويشى؟!
قىزى:
— مەنىڭ اتام — دانالاردىڭ داناسى،
شەجىرەشى ابىزداردىڭ جالعاسى.
ال اجەمنىڭ ناسيحات پەن مەيىرىمى،
تاۋسىلمايتىن بۇلاق سىندى ارناسى.
«وتاعاسى» - دەيدى اپام اتامدى،
«شامشىراعىم» - دەيدى اتام اپامدى.
ءبىر بۇرىشتا تاياقتارى ايقاسىپ،
ەكى قارتقا تۇمسىقتارىن توسادى.
مامپاسيگە تولتىرىپ اپ قالتاسىن،
تاراتاتىن بالا كورسە ءار تالىن.
بەرەكە مەن مەرەكەنىڭ شۋاعى،
اتا-اجەم بار بولسا ەكەن ءاردايىم!
اناسى:
— قۇلىنىم سول! (قىزىنىڭ ماڭدايىنان سۇيەدى) تاماشا! ءالى دە ۇيقاسىن دۇرىستاساڭ، سەنەن اجەپتەۋىر اقىن شىعادى - دەپ ويلايمىن.
قىزى:
— راقمەت اناشىم! (اناسىن قۇشاقتايدى) اناشىم، اۋىلعا نوۋتبۋگىمنىڭ بىرەۋىن اپارسام بولا ما؟ گۇلنازدىڭ نوۋتبۋگى ىستەمەي قالىپتى. سىيلايىن دەگەم... ءسىز قارسى ەمەسسىز بە؟ مەنەن «كيمەيتىن كيىمدەرىڭ بولسا بەرشى؟» - دەپ سۇراعان. كيىمگە قوسا كىشكەنە اقشا دا بەرەيىكشى..؟ قارىزدارى كوپ ەكەن...
اناسى:
— جاقسى كۇنىم! بەرەتىن زاتتارىڭدى دايىنداي عوي؟!
قىزى:
— راقمەت، اناشىم! (قۋانىپ ساحنادان جۇگىرىپ شىعىپ كەتەدى)
اناسى (اكەسىنە قوڭىراۋ شالادى):
— اكەسى، وتكەندەگى جيناپ جۇرگەن اقشانىڭ جارتىسىن قاينىما بەرسەك قايتەدى؟ قارىزدارى كوبەيىپ كەتكەن سەكىلدى. قارسى ەمەسسىڭ بە؟ جاقسى، جارايدى.
قىزى (قايتا جۇگىرىپ شىعىپ):
— اناشىم، وقىڭىزشى. ءبىز دۇرىس ىستەپ جاتىر ەكەنبىز. مىنا اعا ينستاگرامدا «تۋىستىق قارىم-قاتىناستى ۇزبەي، جاقىندارىنا جاقسىلىق جاساعان ادامنىڭ ءومىر جاسى ۇزاق بولادى!» - دەپ جازىپ قويىپتى. اتام مەن اجەمنىڭ دە ءومىر جاسى ۇزاق بولسا ەكەن؟ ول ءۇشىن نە ىستەۋىم كەرەك؟
اناسى:
— دۇعا جاسايمىز بالام! باسقا نە ىستەيمىز؟ ءجۇر، تەزىرەك بازارعا بارايىق؟ بازار ەرتە جابىلىپ قالادى.
قىزى:
— مەن، دايىنمىن اناشىم!
(ەكەۋى كەتەدى)
You Might Also Like
-
ءال-فارابي اتىنداعى قازاق ۇلتتىق ۋنيۆەرسيتەتى
-
جىل سايىن 20 قاراشادا الەم قاۋىمداستىعى بۇۇ باس اسسامبلەياسىنىڭ ۇسىنىسىمەن دۇنيەجۇزىلىك بالالاردى قورعاۋ كۇنىن اتاپ وتەدى.
