قاجىماس دوس حالىقتا جوق،
اينىماس سەرت قايدا بار؟
الدا كورگەن ارتتا جوق،
مىسقىل، وسەك، ايلا بار.

جاقسىلىعىڭ كۇندە ۇمىت،
ءبىر جاڭىلساڭ، بولدى كەك.
پايداسىنان بوي سۋىت،
ءوزى تيمەي جۇرسە تەك.

پايدا، ماقتان وزىنەن،
ارتىلا ما انت ۇرىپ؟
جارىسا وسەك سوزىنەن،
ايتا بەرسىن شارق ۇرىپ.

كىمگە دوستىق كوپ ەتتىم،
ءتۇبى بولدى ءبىر كەيىس.
جاقسى ءومىرىم اۋرە1 ەتتىڭ،
جار تابا الماي ءبىر تەگىس.

جاۋ قوجاڭداپ بۇرتايىپ،
دوس قۇبىلىپ، اۋرە ەتەر.
كىمى تەنتەك، كىمدە ايىپ،
تەكسەرە الماي ءومىر وتەر.

سىيلاسارلىق تەكتىنىڭ،
كىم تانىماس نۇسقاسىن؟
كۇندە ءوزىمشىل ەپتىنىڭ،
نەسىن ادام ۇستاسىن؟

1 ءاۋارا (پارسىشا) – قاڭعىرۋ، سەرگەلدەڭگە سالىنۋ

---