InfoHub Logo

كەز-كەلگەن اتا-انانى ىس-ارەكەتىمەن ون وراپ الاتىنداي بالالاردىڭ بۇتىندەي ءبىر ۇرپاعى پايدا بولدى. تانىس بولىڭىزدار - سەنتەنيالدار. بۇلار ەرتەڭ-اق ەر جەتىپ، ەرەسەك ادامدارعا اينالادى. كوزدى اشىپ-جۇمعانشا ولار الەمدى جاۋلاپ الادى. ولاردىڭ كىم ەكەندىگىن، الدىڭعى بۋىننان ولاردىڭ قانداي ايىرماشىلىعى بار ەكەندىگىن جانە ولارمەن قالاي بىرلەسە ارەكەت جاساۋدى ۇيرەنۋ كەرەكتىگىن تالقىلاپ كورەيىك.

ۇرپاققا قاتىستى بۇل نە داۋ، تۇسىندىرەتىن بىرەۋ بار ما؟

ۇرپاقتار تەورياسىن 1991 جىلى نيل حاۋ (Neil Howe) مەن ۋيليام شتراۋسس (William Strauss) سيپاتتاپ بەرگەن بولاتىن. بۇل تەوريا بويىنشا ۇرپاقتار ءبىرىن ءبىرى 20-25 جىلدا ءبىر رەت اۋىستىرادى. جۋىردا ميللەنيالداردان كەيىن كەلەتىن – سەنتەنيالدار تىركەلدى، ولاردى تاعى دا Z بۋىنى دەپ تە اتايدى. ءسىرا، بالالاردىڭ اتا-انالارىنان وسىنشالىقتى ايىرماشىلىقتا بولۋى تاريحتا العاش رەت شىعار.

سەنتەنيالدار دەگەن كىمدەر؟

ولار 1996 جىلدان كەيىن نەمەسە 2000 جىلدان كەيىن (ءتۇرلى زەرتتەۋ دەرەكتەرى بويىنشا) تۋىلعاندار. جىلدارداعى شاشىراڭقىلىق، ازىرگە زەرتتەۋلەردىڭ ازداۋ بولۋىنا بايلانىستى بولىپ وتىر. سەنتەنيالدار ازىرگە جاس، الايدا ولاردى ەشكىممەن شاتاستىرا المايسىڭ.

باسقا ۇرپاقتاردان نەسىمەن ەرەكشەلەنەدى؟

بۇلار عالامتور زامانىندا تۋىلعان العاشقى بۋىن. گادجەتسىز ءومىر قانداي بولعانى ولاردىڭ ەستەرىندە جوق، جانە كۇنىنە 8 ساعاتتان ارتىق ۋاقىتتارىن سمارتفونمەن نەمەسە پلانشەتپەن وتكىزەدى. سەنتەنيالداردا ءار قادامعا قوسىمشا بار، ولار ونى اۋامەن دەمالعانداي، شىنايى ءىس جۇزىندە پايدالانادى. Z بۋىنى الەمدى ساندىق جانە ناقتى دەپ بولەدى، ولاردىڭ ومىرلەرى ەكرانعا جانە كەرى باعىتتا بىرتىندەپ اۋىسادى.

تەحنولوگيا سەنتەنيالدارعا قالاي اسەرەتتى؟

سەنتەنيالدار جەلىدە وتىرىپ، ءاتى-جونىن كورسەتپەي حابار الىسقاندى جاقسى كورەدى: جاسىرىنۋعا بولاتىن الەۋمەتتىك جەلىلەردى دۇرىس كورەدى. بۇل Twitter ەمەس، حابارلامالار جويىلىپ وتىراتىن Snapchat. بۇل مۋلتي مادەني ورتادا ءوسىپ كەلە جاتقان العاشقى بۋىن. سەنتەنيالدارعا اڭگىمەلەسىپ وتىرعان ادامىنىڭ قاي جەردە تۋىلعانى جانە ونىڭ تۇر-كەلبەتى قانداي ەكەندىگى ءبارىبىر. بالكىم، بۇل ەڭ ءبىر ءتوزىمدى جانە سالماقتى بۋىن شىعار.

ولاردىڭ جارناماعا دەگەن يممۋنيتەتتەرى كىرىكتىرىلگەن ادبلوك. جارنامالىق باننەرلەر مەن حابارلامالارعا كوزى ۇيرەنىپ كەتكەندىگى سونشالىق، ولار تىپتەن جارنامالارعا كوڭىل اۋدارماۋلارى دا مۇمكىن، ال جارناما ولاردى قىزىقتىرۋى ءۇشىن وندا شىنىمەن دە قىزىقتىراتىنداي ءبىر نارسە بولۋى ءتيىس.

كەمشىلىگى – سەنتەنيالدار ۇزاق ۋاقىت وي شوعىرلاندىرۋدى ۇناتپايدى. بالالار مەن جاسوسپىرىمدەر اراسىندا كوڭىل ءبولۋدىڭ جەتىسپەۋشىلىك بەلگىسى مەن گيپەربەلسەندىلىك كەڭ تارالعان. سوندىقتان Z بۋىنى وقىعاننان گورى، كوزبەن كورگەندى دۇرىس سانايدى. ولار از ۋاقىتتا وتە كوپ اقپارات ۇعىنىپ الۋى قاجەت.

ولار نەلىكتەن سونداي ىقىلاسسىز؟ ولار اقىلسىزداۋ ما؟

جوق. سەنتەنيالدار تەحنولوگيامەن بىرگە قاتارلاسا وقىعاندار جانە پاندەردى تۇس-تۇستان توعىستىرا وقىپ ۇيرەنۋگە داعدىلانعان. ولاردىڭ ميىندا وقۋلىقتىڭ ءاربىر پاراگرافى «ۆيكيپەدياداعى» ءتارىزدى گيپەرسىلتەمەلەر تۇرىندە ءتىزىلىپ تۇر. سونىمەن بىرگە، ولار عالامدىق اۋقىمدا ويلاۋعا داعدىلانعان، ويتكەنى الەمنىڭ بارلىق جەرىنەن اقپاراتتى لەزدە الادى. ولار جاڭالىق اشقىسى كەلەدى، زەرتتەۋلەر مەن اشىلۋلار جاساعاندى ۇناتادى.

ءيا، سەنتەنيالدار نازارىن ءجيى باسقا نارسەگە اۋدارادى، سوندىقتان دا تەز شەشىم قابىلدايدى. Z بۋىنى ءبىر سۇراققا بىرنەشە رەت قايتا ورالعاندى ۇناتپايدى.

ولار نە ىستەي الادى؟

ولار كوزبەن كورگەندى دۇرىس سانايتىن بۋىن. جەلىدە تىلدەسە وتىرىپ، سەنتەنيالدار ەمودزيلەردى، سمايلداردى، سۋرەتتەردى پايدالانادى. وسىلايشا ولار وزدەرىنىڭ اينالاسىنا ادامداردى تارتا الادى. جاسوسپىرىمدەر اقپارات قانداي زاڭدىلىق بويىنشا جۇرەتىنىن جانە كوبىرەك لايك جيناۋ ءۇشىن Instagram-عا قاي كەزدە سۋرەت جاريالاۋ قاجەتتىگىن ناقتى بىلەدى. ۇساق-تۇيەك دەيسىز بە؟ ال ەندى اينالاسىنا ادامداردى توپتاستىرا بىلەتىن وسى جاسوسپىرىمدەر نارىققا شىققاندا نە بولاتىنىن ويلاپ كورىڭىز. بۇرىنعى وتكەن بۋىن بوس قالادى.

ال ولار لايكتان باسقا، قاندايدا ءبىر نارسەنى باعالاي ما؟

ولار، باسقالارعا قاراعاندا، قاۋىپسىزدىكتى باعالايدى. بۇل بۋىن لاڭكەستىك پەن ەكونوميكالىق داعدارىس داۋىرىندە ءوسىپ كەلە جاتقاندىقتان بولار، سەنتەنيالدار تۇراقتىلىقتى، تىنىشتىقتى جانە وركەندەۋدى قالايدى. ولارعا بىررەتتىك قولدانىستاعى زاتتار ۇنامايدى، ولار ۇزاق ۋاقىتقا جارايتىن نارسەلەردى ساتىپ العىلارى كەلەدى. ولاردىڭ اراسىندا مينيماليست بولۋ سانگە اينالعان.

سەنتەنيالداردىڭ ءومىر تۋرالى جانە جەتىستىككە قالاي قول جەتكىزۋگە بولاتىندىعى تۋرالى تۇسىنىكتەرى وتە پاراساتتى. ميللەنيالدار، وزدەرىنىڭ قانداي كوركەم جانە تاماشا ەكەندىگىن بۇكىل الەم بايقاسا دەپ ارماندايدى. سەنتەنيالداردا ونداي بوس قيال جوق. ولار كوپ جۇمىس ىستەۋگە جانە كوبىرەك اقشا تابۋعا ۇمتىلادى: وقۋ بىتىرگەندەردىڭ 72%-ى كاسىپكەرلىك تۋرالى ويلانادى.

سەنتەنيالدار – بۇل بۇلىك شىعارۋشى جاسوسپىرىمدەر ەمەس. ولار شىلىمدى از شەگەدى جانە ىشىمدىكتى از ىشەدى، تىپتەن جىنىستىق قاتىناسقا دا بارىنشا جاۋاپكەرشىلىكپەن قارايدى. دۇنيەجۇزىلىك دەنساۋلىق ساقتاۋ ۇيىمى بۇكىل الەم بويىنشا جاسوسپىرىمدەردىڭ جۇكتى بولىپ قالۋىنىڭ سانى ازايعاندىعى تۋرالى ايتۋدا، ال اقش-تا قازىرگى ۋاقىتتا بۇل كورسەتكىش سوڭعى 50 جىل ىشىندەگى ەڭ تومەنگى كورسەتكىش بولىپ وتىر.

ولار جۇيەنى بۇزعىسى كەلمەيدى، ولار الەمدى باياۋ جانە دۇرىس جولمەن جاقسارتۋعا ازىرلەنۋدە. بالكىم، بۇل جاسوسپىرىمدىك قيال شىعار. ءبىراق تەوريانى ەسكە الار بولساق، ولاردىڭ نەگىزگى كوزقاراسى قالىپتاسىپ بولدى.

سەنتەنيالدارمەن بايلانىس ورناتۋعا بولا ما؟

بىرىنشىدەن، ولار ءۇشىن بارلىعىن دا كورنەكى ەتۋ قاجەت، كەز-كەلگەن اقپارات كورنەكى بولۋى قاجەت.

ەكىنشىدەن، بارلىعىن دا تەز جاساۋ كەرەك. جۇمىستىڭ جىلدامدىعى قاشان دا ماڭىزدى بولىپ قالادى. ەگەر دە ءسىز ءاربىر پلاكات پەن ءاربىر جاريالانىمدى الەۋمەتتىك جەلى ارقىلى ەكى اي بويى كەلىسىمنەن وتكىزۋگە داعدىلانعان بولساڭىز، وندا ءسىز ۇتىلدىڭىز.

ۇشىنشىدەن، ۆيرۋستىق جارناما جاساڭىز. سەنتەنيالدار قىزىقتى نارسەمەن بولىسكەندى ۇناتادى جانە ول تۋرالى تەز ۇمىتىپ كەتەدى. ەرەكشەلەنۋدى ۇيرەنىڭىز.

تورتىنشىدەن، ولار ساتىپ العاندى جاقسى كورەدى، الايدا ونلاين ساتىپ الۋدى دۇرىس سانايدى، ال ينتەرنەتكە ءموبيلدى قۇرىلعىلار ارقىلى كىرەدى. ولارمەن ءدال وسى ارنالار ارقىلى جۇمىس ىستەڭىز.

ماعان سەنتەنيالدارمەن جۇمىس ىستەۋدى ۇيرەنۋ نە ءۇشىن قاجەت؟

ءار بۋىن – بۇل بەلگىلى ءبىر ماقساتتى اۋديتوريا. ەگەر دە سىزگە كليەنتتەرمەن نەمەسە اۋديتوريامەن جۇمىس ىستەۋگە تۋرا كەلسە، وندا ءسىز، كەڭ ماعىنادا، ناقتى وسى ۇرپاقتارمەن بىرلەسە ارەكەت ەتەسىز.

سەنتەنيالدار – وزگەشە بۋىن. ءبىز ولاردىڭ ساتىپ الۋعا جانە مينيماليزمگە دەگەن سۇيىسپەنشىلىكتەرىن، ءبىلىمدارلىقتارى مەن گيپەربەلسەندىلىكتەرىن، كوزبەن كورىپ ويلاۋ مەن كىرىكتىرىلگەن ادبلوكتارىن قالاي ۇيلەستىرەتىندىكتەرىن تۇسىنە المايمىز. ال بۇل ولاردىڭ قولدارىنان كەلەدى. وسىدان كەيىن بالالار بۇرىنعىدان ناشار دەپ كىم ايتا الادى؟

---