Стамбулдың Жоғарғы қылмыстық соты Израиль премьер-министрі Биньямин Нетаньяхуды Интерпол арқылы аса қауіпті қылмыскер ретінде халықаралық іздеуге жариялады. Бұл шешім 2026 жылдың 14 шілдесінде, сейсенбі күні қабылданды, деп хабарлайды infohub.kz.
Сот Нетаньяхуға Тель-Авивтің Газа секторына гуманитарлық көмек жеткізетін флотилияны тоқтатуына байланысты халықаралық тұтқындау ордерін шығаруды ұйғарды. Бұл — Газаға көмек жеткізуге тырысқан Global Sumud Flotilla гуманитарлық флотилиясы.
Сәуір айында Стамбул прокуратурасы Нетаньяхуды қоса алғанда, 35 адамға қатысты флотилия кемелерін қарулы басып алу ісі бойынша айыптау қорытындысын жариялады. Нетаньяхудан бөлек, айыпталушылар қатарында Израиль қорғаныс министрі Исраэль Кац, оның алдындағы әріптесі Йоав Галант, ұлттық қауіпсіздік министрі Итамар Бен-Гвир, Бас штаб бастығы Эяль Замир және басқалар бар.
Оларға «адамзатқа қарсы қылмыстар», «геноцид», «бас бостандығынан айыру», «денсаулыққа қасақана зиян келтіру», «азаптау», «тонау», «мүлікті жою немесе бүлдіру» және «көлік құралын басып алу» айыптары тағылды. Прокуратура барлық айыпталушыларға өмір бойы бас бостандығынан айыру жазасын тағайындауды талап етті.
Мамырда Түркия президенті Режеп Тайып Ердоған Нетаньяхуға жақын арада бүкіл мұсылман әлемінен «сабақ алатынын» ескертті.
Израиль тарапы айыптауларды жоққа шығарады. Тель-Авивтің пікірінше, Global Sumud флотилиясын Түркия Газа секторының теңіз блокадасын бұзудың тағы бір әрекеті ретінде дайындаған.