Қазақстанда жалған дипломдарға қарсы белсенді күрес жүргізілуде: бүгінгі таңда 46 жалған құжат пен оларды заңсыз дайындаумен айналысқан 20 интернет-ресурс анықталды, деп хабарлайды infohub.kz сайты.
Ғылым және жоғары білім министрлігінің мәліметінше, соңғы уақытта желіде жалған дипломдар туралы ақпарат жиі кездеседі. Құжаттардың түпнұсқалығын тексеру үшін ведомство 1991 жылдан бері берілген дипломдардың дерекқорын құрды.
Министрлікте түсіндіргендей, дипломдар арнайы модуль арқылы бірегей нөмірлер мен QR-кодтар беріле отырып жасалады. Жүйеге тек осы модульде тіркелген жоғары оқу орындарының ресми жауапты қызметкерлері ғана қол жеткізе алады. Дипломдар «Бірыңғай жоғары білім беру платформасы» (ЕПВО) ақпараттық жүйесіндегі білім алушылар туралы деректер негізінде жасалады. Егер білім алушы туралы мәлімет ЕПВО-да болмаса, диплом нөмірін қалыптастыру мүмкін емес.
Өз үлгісіндегі, бірақ жасалған бірегей нөмірі мен QR-коды жоқ білім құжаттары жарамсыз деп саналатыны атап өтілді. «Сонымен қатар, жоғары оқу орындары деректерді цифрландыруды жалғастыруда, ал жұмыс берушілер дипломның түпнұсқалығын арнайы сервис арқылы тексере алады: https://epvo.kz. Дипломның электрондық нұсқасы электрондық үкімет қосымшасында да қолжетімді („Цифрлық құжаттар“)», — деп қосты министрлік.
Сонымен қатар, Қазақстанда жалған білім құжаттарын жасау және сату фактілеріне тұрақты мониторинг жүргізіліп, жолы кесілуде. Анықталған жағдайлар бойынша материалдар ІІМ мен Мәдениет және ақпарат министрлігіне жіберілді.
ҚР Қылмыстық кодексінің 385-бабына сәйкес, жалған құжаттарды жасау немесе пайдалану айыппұл салуға, түзеу жұмыстарына немесе 2 жылға дейін бас бостандығын шектеуге не бас бостандығынан айыруға әкеп соғады.