Жаркентте полицейлер оғаш ұрлықты ашты, оның басты олжасы ақша да, қымбат техника да емес, шоколад болды, деп хабарлайды infohub.kz сайты.
Жетісу облысы полиция департаментінің Instagram-дағы ресми парақшасында хабарланғандай, полицияға қаладағы сауда орталықтарының бірінің өкілі жүгініп, бір маркалы шоколадтың жүйелі түрде жоғалып жатқанын айтқан. Бейнебақылау камераларының жазбаларын тексергеннен кейін күзет қызметінің қызметкерлері бір ер адамның бірнеше апта бойы дүкенге үнемі келіп, шоколад плиткаларын сөмкесі мен қалтасына жасырып, содан кейін тауарды төлемей сауда залынан шығып кеткенін анықтаған.
Анықталғандай, күдікті бір схемамен әрекет еткен: дүкенге кіріп, оны ешкім бақыламайтынына көз жеткізіп, шоколадты жеке заттарына салып, шығып кеткен. Бірнеше минуттан кейін ол қайта оралып, әрекетін қайталаған. Кейбір күндері ер адам осындай бес-алты рет барып-келген.
Полиция деректеріне сәйкес, бір ай ішінде сауда орталығынан 625 плитка шоколад ұрланған. Келтірілген материалдық залалдың жалпы сомасы 530 мың теңгеден асты.
Жүргізілген жедел-іздестіру іс-шараларының нәтижесінде Панфилов аудандық полиция бөлімінің қызметкерлері Жаркенттің 41 жастағы тұрғынын анықтап, бөлімшеге жеткізген. Ер адам кінәсін толық мойындаған.
Осы факті бойынша сотқа дейінгі тергеу жүргізілуде. Болған оқиғаның барлық мән-жайы анықталуда. Полицейлер қамауға алынған адамды басқа да осыған ұқсас қылмыстарға қатысы бар-жоғын тексеруде.