Абай облысында қызғаныш пен маскүнемдікке салынған ер адам сот алдына келіп, қоғамдық жұмыс жазасын алды, деп хабарлайды infohub.kz.
Облыс бойынша қылмыстық-атқару жүйесі департаментінің баспасөз қызметінің мәліметінше, Абай облысының 49 жастағы тұрғыны бір іс-шарада әйелін оның ескі танысына қызғаныпты. Үйге масаң күйде оралған ол жанжал шығаруды жөн көрген. Ерлі-зайыптылар арасында сөзге келіп, кейін төбелеске ұласқан. Жанжал кезінде ер адам әйелінің бетіне бірнеше рет соққы жасап, денсаулығына жеңіл зиян келтірген.
Сот оны кінәлі деп танып, 20 сағат қоғамдық жұмыс жазасын тағайындады. Сотталған адам Абай облысы Жарма ауданы пробация қызметінің есебіне қойылды. Есепке алу кезінде онымен профилактикалық және түсіндіру әңгімесі жүргізілді.
Ер адам әйелімен 20 жылдан астам уақыт бойы некеде тұратынын айтты. Олар бірге төрт бала тәрбиелеп отыр: үлкен қызы 18 жаста, кіші ұлы алтыда. Жазасын өтеу үшін ол ауылдық округ әкімдігінің аппаратына қоғамдық жұмысқа жіберілді, онда жалдамалы жұмысшы болып еңбек етеді.
«Мен істеген ісіме шын жүректен өкінемін. Енді қызғануға ешқандай негізім болмағанын түсінемін. Өз ұстамсыздығым мен масаң күйімнің салдарынан ең жақын адамыма қиянат жасадым. Әйелімнің, балаларымның және туыстарымның алдында ұятпын. Бір ойланбаған әрекет қылмыстық жауапкершілікке әкеліп, іс-әрекетіме жаңа көзқараспен қарауға мәжбүр етті. Енді кез келген отбасылық келіспеушілікті тек бейбіт жолмен шешу керектігін, сөйлесіп, бір-бірімізді тыңдау қажеттігін түсіндім. Қателігімді түзетіп, отбасымның сенімін қайтарып, мұның қайталанбауы үшін бәрін жасағым келеді», — деді сотталған.