Абай облысында таңғы патрульдік шара 49 жастағы Mazda 626 жүргізушісі үшін ауыр салдарға әкелді: ол жеті жылға жүргізуші куәлігінен айырылып, 15 тәулікке қамауға алынды, деп хабарлайды infohub.kz сайты.
Абай облысында таңғы патрульдік шара кезінде полиция қызметкерлері Mazda 626 көлігін байқап, тексеру үшін тоқтатты. ІІМ ведомстволық сайтында хабарланғандай, рульде 49 жастағы ер адам болған. Құжаттарды тексеру кезінде полицейлер алкоголь иісін сезбеген, алайда жүргізушінің сөйлеуі мен қимылдары түсініксіз болғанын байқаған.
«Медициналық куәландыру қорытындысы бойынша, жүргізуші есірткілік масаң күйде болған», — делінген жарияланымда.
Ер адамға қатысты әкімшілік іс қозғалды. Материалдар сотқа жіберілді, ал көлік айыппұл тұрағына қойылды.
Полиция алкогольдік, есірткілік немесе уытты масаң күйде көлік жүргізу, сондай-ақ мұндай адамға басқаруды тапсыру қоғамға жоғары қауіп төндіретін құқық бұзушылықтарға жататынын еске салды.
«Мұндай әрекеттер үшін 15 тәулікке дейін қамауға алу және 7 жылға көлік құралын басқару құқығынан айыру түріндегі қатаң жаза қарастырылған», — деп хабарлады полиция.
Сондай-ақ құқық қорғау органдары жүргізушілерді жол қозғалысы ережелерін сақтауға және масаң күйде рульге отырмауға шақырды, мұндай әрекеттер жол қозғалысына қатысушылардың өмірі мен денсаулығына тікелей қауіп төндіретінін атап өтті.