Абидостан табылған сүйек қалдықтарына жүргізілген сот-медициналық сараптама ежелгі мысыр билеушілерінің қызметшілері әдейі өлтірілген болуы мүмкін екенін көрсетті, деп жазады The Guardian. Пердью университетінің биоархеологы Розалин Кэмпбелл Абидостағы Умм эль-Кааб патшалық некрополінен табылған, жасы шамамен 5000 жылға жуықтайтын бас сүйектерді зерттеді, деп хабарлайды infohub.kz сайты.
Кембридж университетінің Дакворт коллекциясында сақталған сүйек қалдықтарына жасалған сот сараптамасының нәтижелері Frontiers in Environmental Archaeology журналында жарияланды. Ғалымдардың жұмысы Ежелгі Мысырдың Бірінші әулеті билеушілерінің ғұрыптық тәжірибелеріне жаңаша қарауға мүмкіндік береді.
Зерттеу барысында мысыртанушы Флиндерс Питри шамамен бір ғасыр бұрын алғаш қазба жұмыстарын жүргізген 46 бас сүйектің 18-інде (шамамен 39%) өлім алдындағы жарақаттар анықталды. Сүйектердегі сызықтық сынықтардың сипаты ағаштан немесе мүйізден жасалған жалпақ доғал заттармен әдейі соққы жасалғанын, ал тастан жасалған шоқпарлар қолданылмағанын көрсетеді. Бұл деректер монархты о дүниеде шығарып салу үшін қызметшілерді ғұрыптық құрбандыққа шалу туралы болжамды растайды.
Алабамадағы Самфорд университетінің мысыртанушысы Дон Маккормактың айтуынша, қол астындағыларды құрбандыққа шалу тәжірибесі ұзаққа созылмаған және Екінші әулет тұсында тоқтаған. Билеушілер саяси тұрақсыздыққа байланысты қатыгез ғұрыптан бас тартып, адам құрбандықтарын қызметшілердің ағаштан және тастан жасалған мүсіншелерімен — ушебтимен алмастырған. Зерттеу авторлары ескі мұражай коллекцияларын заманауи әдістермен одан әрі зерделеу қажеттігін атап өтеді.