Ақтауда топ жасөспірімдер мектеп оқушысын аяусыз соққыға жығып, оқиғаны бейнежазбаға түсіріп, құрбысына қорқытып жіберген. Зардап шеккен баланың әпкесі әлеуметтік желіде оқиғаны баяндап берді, деп хабарлайды infohub.kz.
Қыздың айтуынша, оның інісі таңертең дүкенге шыққанда, 16-17 жастағы екі жасөспірім оны тоқтатып, досына қоңырау шалып, үйден шақыруды талап еткен. Досы шығудан бас тартқан соң, олар ұрып-соғуды телефонға түсіріп, досына: «Шықпасаң, досыңды осылай ұрамыз» деген хабарламамен жіберген.
Зардап шеккеннің әпкесі мұндай әрекеттердің шектен шыққанын атап өтті: «Бұл енді адамгершілікке жатпайды, өлтіруге де алып келуі мүмкін». Шабуылдан кейін жасөспірім ауруханаға жеткізіліп, дәрігерлер компьютерлік томография жасап, шұғыл түрде ауруханаға жатқызған.
Маңғыстау облысы полиция департаменті оқиғаның болғанын растады. Бұл іс бойынша топ адамдар жасаған бұзақылық бабы бойынша қылмыстық іс қозғалды. Ведомствоның баспасөз қызметінде мұндай әрекеттер ауыр қылмыс ретінде сараланатынын, жанжалға қатысушылардың барлығы анықталып, заңды өкілдерімен бірге полицияға жеткізілгенін атап өтті.
Қазіргі уақытта барлық қажетті тергеу амалдары жүргізілуде. Сонымен қатар, кәмелетке толмағандардың заңды өкілдері ата-аналық міндеттерін тиісінше орындамағаны үшін жауапкершілікке тартылды. Іс материалдары кәмелетке толмағандар ісі жөніндегі комиссияға қарауға жіберілді.