Ақтөбеде велокурьер 12 жасар қызды қағып, оқиға орнынан қашып кетті. Зардап шеккен қыздың анасы болған оқиғаның мән-жайын айтып берді, деп хабарлайды infohub.kz.
Оқиға «Сазды» ауданында болған. Қыз үйінің маңында велосипедпен жүрген. Анасының айтуынша, оған ересек ер адам басқарған электровелосипед соққан. Баланы қағып кетсе де, ол тоқтамай, әрі қарай жүріп кеткен. Жедел жәрдемді кездейсоқ өтіп бара жатқандар шақырған.
Зардап шеккен қызды облыстық балалар ауруханасына жеткізген. Дәрігерлер жоғарғы жақ сүйегінің және бет сүйегінің сынуын, сондай-ақ алдыңғы тістерінің сынып қалғанын анықтаған. Қызға операция жасалған, қазір ол жақсарып келеді, бірақ алда ұзақ қалпына келтіру кезеңі күтіп тұр. Анасының айтуынша, жақын арада тіс протездеу мүмкін емес, тек ересек кезінде ғана имплант қоюға болады.
Бейнебақылау камераларының арқасында кінәліні дереу анықтаған. Ол 58 жастағы жергілікті тұрғын болып шықты. Зардап шеккен қыздың анасы оған ең қатаң жаза қолдануды талап етеді. Ол қызының қатты шок пен ауырсынуды бастан өткергенін, енді оны ұзақ емдеу күтіп тұрғанын атап өтті.
Облыстық қоғамдық денсаулық сақтау басқармасы баланың жағдайына қатысты түсініктеме берді. Бөлім меңгерушісі Әлия Шарбакованың айтуынша, жақ-бет хирургінің тексеруінен кейін қыз шұғыл түрде ауруханаға жатқызылып, операция жасалған. Барлық қажетті медициналық көмек көрсетілген, оң динамика байқалады: ісік басылған, жаралар жазылып жатыр. Науқас амбулаториялық емдеуге шығарылған, ортопедиялық және стоматологиялық емдеу ұсынылған.
Еске сала кетейік, бұған дейін Ақтөбеде баланы қағып, жол апаты орнынан қашып кеткен велокурьерді іздегені хабарланған болатын. Полицейлер электровелосипед жүргізушісінің жеке басын анықтады.