Қазақстан құрамасының бұрынғы бас бапкері Әли Әлиев астаналық «Жеңіс» клубындағы жұмысын аяқтады. Бұл шешім маманның клуб басшылығымен кездесуінен кейін қабылданды, деп хабарлайды infohub.kz.
Дереккөздің мәліметінше, тараптар команданың соңғы нәтижелерін талқылап, келіссөз қорытындысы бойынша ынтымақтастықты тоқтатуға келіскен. Әлиевтің өзі кеткенін растады.
«Жеңіс» – өте амбициялы клуб. Соңғы кездері сәттілік жүрмеді. Мұндағылардың бәрін түсінемін: әркім нәтиже қалайды, әркім тыныштық пен тепе-теңдік қалайды. Барлық жауапкершілік менде екенін түсінемін: селекция, команда құру, клубтың бүкіл құрылымы және ең алдымен нәтиже», – деді Әлиев.
45 жастағы маман «Жеңіс» клубын 2025 жылдың желтоқсанында басқарып, клубпен бір жылдық келісімшарт жасасқан еді. Оған дейін Әлиев Қазақстан құрамасын жаттықтырып, оның басшылығымен жеті матч өткізген – екі жеңіс және бес жеңіліс.
ҚПЛ-дің ағымдағы маусымында Әлиевтің басшылығымен астаналық команда 20 матч өткізіп, бес жеңіске жетіп, сегіз рет тең ойнап, жеті рет жеңіліп қалды. «Жеңіс» 23 ұпай жинап, 20-турдан кейін турнирлік кестеде сегізінші орында тұр.
Әлиевтің чемпионаттағы соңғы матчы 2 тамызда «Елімайға» қарсы өткен үйдегі кездесу болды, ол 0:0 есебімен аяқталды. Оған дейін «Жеңіс» «Каспийден» 2:3 есебімен ұтылған еді.
Сонымен қатар, «Жеңіс» Қазақстан Кубогы үшін күресті жалғастыруда. Әлиевтің кезінде астаналық клуб «Хромтауды» 4:1, «Оқжетпесті» 3:2 және «Қызылжарды» 2:0 есебімен тізбектей жеңіп, турнирдің жартылай финалына жетті. Финалға жолдама үшін алғашқы матчта «Жеңіс» «Қайсардан» 1:3 есебімен ұтылды.
AmanVibe деректеріне сәйкес, «Жеңістің» жаңа бас бапкері босниялық маман Владимир Слишкович болуы тиіс. Клуб оның тағайындалуын ресми түрде әлі жариялаған жоқ.
Осылайша, Әлиевтің кетуі ҚПЛ-2026 маусымындағы сегізінші бапкер ауыстыру болды. Сонымен қатар, «Ақтөбе» және «Ертіс» клубтарында бапкерлер екі рет ауыстырылды. Қазақстан чемпионаты командаларындағы барлық кадрлық өзгерістер 4 тамыздағы жағдай бойынша төмендегі кестеде көрсетілген.