Алматыда көлік жүктемесін ескере отырып, коммуналдық тұрақтарды тарифтеудің жаңа жүйесі ұсынылып отыр. Бұл туралы қала әкімдігі хабарлады, деп жазады infohub.kz сайты.
Жоба тұрғындарға тұрақ орындарының қолжетімділігін арттырып, көше-жол желісінің ең сұранысқа ие учаскелеріндегі кептелісті азайтуға бағытталған.
Айта кетейік, коммуналдық ақылы тұрақтардағы сағатына 100 теңгелік қолданыстағы тариф 2016 жылдан бері өзгермеген және 10 жыл бойы қайта қаралмаған. Осы уақыт ішінде Алматы қаласында жүретін көлік саны 1 млн бірліктен асып, жолдар мен тұрақ кеңістігіне салмақ айтарлықтай артқан.
Алматы қаласының жол қозғалысын ұйымдастыру және жолаушылар көлігі басқармасының басшысы Ержан Диханбаев бірыңғай тариф өзінің негізгі міндетін — тұрақ орындарының айналымын қамтамасыз етіп, әсіресе қаланың орталық бөлігінде бос тұрақтардың болуын — орындаудан қалғанын атап өтті. Оның айтуынша, соның салдарынан жүргізушілер бос орын іздеуге көбірек уақыт жұмсауға мәжбүр болып, бұл сапарлар санының артуына және жол желісіне қосымша салмақ түсуіне әкеледі.
Бұл мәселені шешу үшін тұрақ құны нақты аумақтың көлік жүктемесі мен функционалдық мақсатына байланысты болатын дифференциалды тарифтеу жүйесін енгізу ұсынылып отыр.
«Жоба бойынша көлік жүктемесі салыстырмалы түрде төмен учаскелер үшін тариф сағатына 100 теңге деңгейінде сақталады. Тұрақ кеңістігін пайдалану қарқындылығы орташа аумақтар үшін сағатына 150 теңге болады. Ал тұрақ орындары тапшы, қозғалысы қарқынды аймақтар үшін сағатына 200 теңге», — деп хабарлады ведомство.
Сонымен қатар тұрғындар үшін қолданыстағы жеңілдіктер сақталады. Әкімдік еске салғандай, бұрын Алматыда жол қозғалысын ұйымдастыру қағидалары (жол қозғалысы қағидаларымен реттелмеген бөлігінде) бекітілген. Оған сәйкес ақылы тұрақтар аймағында тұратын тұрғын үй иелері арнайы рұқсат рәсімдеп, өз тұрғылықты жеріне жақын таңдаған тұрақта тегін пайдалана алады. Сондай-ақ пайдаланушылардың бірқатар санаты үшін жеңілдіктер қолданылады. Бұл шара жергілікті тұрғындардың мүддесін ескеріп, оларға тұрақ кеңістігін пайдаланудың қолайлы жағдайын жасайды.
Жобаны әзірлеушілердің пікірінше, ұсынылып отырған өзгерістер тұрақ кеңістігін тиімдірек басқаруға бағытталған.
Жобаны іске асыру екінші қатарға тұрақ қою жағдайларын азайтып, бос орын іздеу уақытын қысқартып, қаланың орталық бөлігіне түсетін көлік салмағын азайтып, барлық жол қозғалысына қатысушылар үшін қолайлы жағдай жасайды деп күтілуде.