15 тамыз, бейсенбі күні Алматы мен Атырауда ауаның ластануына ықпал ететін қолайсыз метеорологиялық жағдайлар күтілуде, ал түнде оларға Өскемен қосылады, деп хабарлайды infohub.kz сайты.
«Қазгидромет» мамандарының түсіндіруінше, қолайсыз метеорологиялық жағдайлар (ҚМЖ) — бұл тымық ауа райы, әлсіз жел, тұман және инверсия сияқты қысқа мерзімді метеорологиялық факторлардың жиынтығы, олар атмосфераның жерге жақын қабатында зиянды заттардың жиналуына әкеледі. ҚМЖ пайда болған кезде елді мекендерде ауа сапасы нашарлауы мүмкін. Ластану деңгейі көбінесе жел, жауын-шашын, ылғалдылық пен температураны қамтитын синоптикалық жағдайдың болжамына байланысты.
Қолайсыз жағдайларға байланысты мамандар ашық ауада, әсіресе автомобиль жолдарының және басқа да ластану көздерінің жанында болу уақытын қысқартуды ұсынады. Балалар мен жүкті әйелдерге ұзақ серуендерден бас тартқан жөн. Өкпенің созылмалы аурулары, жүрек-қан тамырлары және аллергиялық аурулары бар адамдар көшеде жүргенде дәрі-дәрмектерін өздерімен бірге алып жүрулері керек. Сондай-ақ ашық ауада физикалық жүктемені шектеу, ал дене шынықтыру және спортпен жабық кешендерде айналысу ұсынылады.