Алматы полициясы қазақстандықтарға қоғамдық орындарда сыртқы келбетке қойылатын заң талаптарын еске салып, қандай жағдайларда бетті жабуға болатынын айтты, деп хабарлайды infohub.kz сайты.
Алматыда құқық қорғау органдары бетті тануға кедергі келтіретін киім кию туралы заңнама талаптарын сақтау бойынша түсіндірме жұмыстарын жүргізуде. Мұндай бұзушылық үшін әкімшілік жауапкершілік қарастырылған. Бұл ҚР ӘҚБтК-нің 434-3-бабына қатысты.
«Бұл адамның сыртқы келбетіне қатысты емес, тек қоғамдық қауіпсіздік талаптарына қатысты екенін түсіну маңызды. Заң бетті жабуға болатын нақты жағдайларды қарастырады», — деді Жандос Қавлиев.
Оның айтуынша, мұндай ерекшеліктерге медициналық көрсеткіштер, белгілі бір ауа райы жағдайлары, қызметтік және еңбек міндеттерін атқару, сондай-ақ спорттық және мәдени-бұқаралық іс-шараларға қатысу жатады.
«Басқа жағдайларда азаматтар заңнама талаптарын ескеруі қажет. Біздің міндетіміз — ең алдымен осы нормаларды түсіндіру және ықтимал бұзушылықтардың алдын алу», — деп атап өтті Жандос Қавлиев.
Полицияда шектеулер адамның сыртқы келбетіне емес, дәл бетті тану мүмкіндігіне қатысты екенін атап өтті.