Үкімет отырысында премьер-министр Олжас Бектенов энергетика министріне 14 тамызда Алматыда болған жаппай электр қуатының өшірілуіне қатысты тексеру нәтижелері туралы сұрақ қойды, деп хабарлайды infohub.kz.
Энергетика министрі Ерлан Ақкенженовтің мәлімдеуінше, еліміздің оңтүстік өңірлеріндегі электр энергиясы тапшылығын ескере отырып, министрлік Алматыдағы ЖЭО-2 және ЖЭО-3, сондай-ақ Түркістан облысындағы қуаты 1000 мегаватт жаңа бу-газ қондырғысын қоса алғанда, жаңа генерация объектілерін іске қосуды аяқтап жатыр. Сонымен қатар, электр желілері нығайтылуда: оңтүстік энергия жүйесінің сенімділігін арттыру үшін Шу-Жамбыл-Шымкент 500 киловольттік желісі салынуда.
Бектенов бұл стратегиялық маңызды бағыт екенін атап өтіп, осы жұмысты жандандыру қажеттігін айтты.
Еске салайық, 14 тамызда Алматы мен Алматы облысында ауқымды блэкаут болды. Энергетика министрлігі баспасөз қызметінің мәліметінше, оның себебі — Орталық Азия энергия жүйесі тарапынан электр энергиясы ағынының күрт өзгеруінен туындаған қуаттың артуы. Соның салдарынан аварияға қарсы автоматты жүйе іске қосылып, Қазақстанның кейбір өңірлерінде бірқатар тұтынушылар электр қуатынан ажыратылды.
Алматыда бағдаршамдар өшіп, жолдарда кептеліс пайда болып, қала тұрғындары өздері қозғалысты реттеуге шықты. Сондай-ақ, сыртқы электрмен жабдықтау толық тоқтағандықтан, метро уақытша жұмысын тоқтатты, ал «Шымбұлақ» курортының келушілері канат жолының кабиналарында қалып қойды.
Кейінірек KEGOC компаниясы электр қуатының өшірілуі Қазақстанның сегіз өңірінде байқалғанын хабарлады.