2026 жылдың 1 қыркүйегінен бастап Алматыда автомобильдердің экологиялық нормативтерге сәйкестігіне арналған жеке техникалық тексеру енгізіледі. Бензин, газ және дизель отынымен жүретін көліктер үшін кезекті техникалық байқау мерзімі келгенде бұл тексеру міндетті болады, деп хабарлайды infohub.kz сайты.
LEZ жобасының үйлестірушісі Дулат Маратов атап өткендей, әдеттегі техникалық байқау мен жаңа экологиялық тексеру – мүлдем басқа процедуралар. Біріншісі көліктің жалпы техникалық жағдайын бағаласа, екіншісі тек СТ РК 1433-2023 стандарты бойынша шығарындыларды өлшеуге бағытталған.
Бензин және газ көліктерінде пайдаланылған газдардың уыттылығы, ал дизельді көліктерде түтіннің мөлшері тексеріледі. Экотестен өтпейінше, диагностикалық карта алу мүмкін болмайды.
Автокөлік иелеріне тексеруден алдын ала өтудің қажеті жоқ. Егер көлік 1 қыркүйекке дейін техникалық байқаудан өткен болса, берілген құжат мерзімі аяқталғанға дейін жарамды болады. Алайда келесі тексеру мерзімі келгенде, қажетті жабдықтары бар аккредиттелген станцияларға баруға тура келеді. Кәдімгі техникалық байқауды кез келген жұмыс істеп тұрған пункттен өтуге болады.
Сонымен қатар, аккредиттелген станцияда жүргізуші екі процедураны да бір уақытта өте алады. Мұндай пункттердің тізімі almaty-parking.kz сайтында жарияланады.
Сонымен қатар, жиналған деректер LEZ төмен шығарындылар аймағы үшін автопарктің экологиялық жағдайының объективті базасын қалыптастыруға мүмкіндік береді.