Алматыдағы Есентай өзенінің жағасындағы тасталған қонақүй ғимараты бұзылмайды, керісінше IT-орталыққа айналдырылады, деп хабарлайды infohub.kz сайты.
Алматы әкімдігінің редакция сауалына берген жауабында қазір нысанда кешенді жөндеу жұмыстары жүріп жатқанын мәлімдеді. Жұмыс барысында ғимараттың қасбеті мен терезе ойықтары жаңартылып, ішкі бөлмелер қайта жоспарланып, іргелес аумақ абаттандырылады.
Жөндеу жұмыстары аяқталған соң ғимаратты Алматы IT-хабын орналастыру үшін пайдалану жоспарлануда. Жобаның инвесторы — «LeanQor» ЖШС, ол жөндеуді өз қаражаты есебінен қаржыландырады. Дәл осы компания Алматыдағы Назарбаев даңғылындағы үйдің қасбетін жөндеу кезінде әйгілі муралды жойған болатын.
Әкімдіктің мәліметінше, нысан бұрын қанағаттанарлықсыз күйде болған. Билік ғимаратты бұзудың орнына, бос тұрған нысанды қала қажеттіліктеріне бейімдеуді жөн көрген. Жоба аяқталған соң ғимарат жер телімімен бірге Алматы қаласының Цифрландыру басқармасына беріледі.
«Болашақта нысан цифрландыру және жасанды интеллектті дамыту саласындағы мемлекеттік бағдарламаларды іске асыру, сондай-ақ IT, AI, креативті индустрия және басқа да сабақтас бағыттарда жұмыс істейтін резиденттерді орналастыру үшін пайдаланылатын болады», — деп қосты ведомство.
Қазіргі уақытта ғимараттың жөндеуден кейін қандай болатыны белгісіз. Бұрынғы қонақүй болашақ IT-хабқа сай, әйнегі көп заманауи қасбетке ие болады деп болжауға болады. Дегенмен, 100% дайын ғимараттың сыртқы келбетін неге өзгерту керек деген сұрақ қалады.
Еске салайық, 26 тамызда әлеуметтік желілерде ғимараттың бұзылуы туралы хабарламалар мен қасбеті бұзылған кадрлар пайда болған. Көктем-3 шағын ауданындағы 22 мекенжайындағы ауданы шамамен 9,5 мың шаршы метрді құрайтын тоғыз қабатты кешен 2017 жылы қонақүй ретінде салынған. Алайда ол ешқашан ашылмаған.
2022 жылы құрылысы аяқталмаған ғимаратты сатуға тырысқан, бірақ сатып алушы табылмай, нысан бос тұрған. 2025 жылдың наурыз айында ғимаратта өрт болған. 2025 жылдың маусымында қонақүй «Қайтарылған активтерді басқару компаниясы» ЖШС балансында тұрғаны хабарланған, кейін КУВА бұл ақпаратты жоққа шығарған.
Кейін қонақүйді мемлекетке Қайрат Сатыбалды — тұңғыш президент Нұрсұлтан Назарбаевтың жиені тапсырғаны белгілі болды.