Алматыда алдағы демалыс күндері жеңіл рельсті көлік (LRT) құрылысына және жөндеу жұмыстарына байланысты бірнеше жол учаскесінде уақытша шектеулер енгізіледі, деп хабарлайды infohub.kz сайты.
Алматы қалалық әкімдігінің баспасөз қызметінен мәлім еткендей, 29 тамыз сағат 08:00-ден 30 тамыз сағат 16:00-ге дейін Абылай хан даңғылының Төле би көшесінен Гоголь көшесіне дейінгі учаскесінде жол қозғалысы толығымен жабылады. Бұл LRT жобасын іске асыру аясында инженерлік желілерді қайта жаңартуға байланысты.
«Жөнделіп жатқан учаскеде ескерту белгілері қойылады. Өз бағытыңызды алдын ала жоспарлауды сұраймыз», — деп атап өтті әкімдікте.
Сонымен қатар, осы демалыс күндері Шаймерденов көшесінің Жандосов көшесінен Сейдімбек көшесіне дейінгі учаскесі де уақытша жабылады. Шектеу 29 тамыз сағат 06:00-ден 30 тамыз сағат 13:00-ге дейін жұмыс істейді. Бұл LRT құрылысына емес, жол төсемінің орташа жөндеуіне байланысты.
Қала билігі мегаполис тұрғындары мен қонақтарын уақытша қолайсыздықтарды ескере отырып, сапарларын алдын ала жоспарлауға шақырады.