Алматыда Хэллоуин күні күтпеген жерден жаппай ұстаулармен аяқталған оқиғаға ресми түсініктеме берілді: қалалық Полиция департаментінің баспасөз қызметі бұл мерекенің тойлануына тыйым салу емес, профилактикалық рейдтер екенін мәлімдеді, деп хабарлайды infohub.kz сайты.
Оқиға орнынан түсірілген кадрларды Egov.press Telegram-арнасы жариялады. «Алматыдағы Хэллоуин Арбаттағы жастардың түрлі-түсті костюмдерімен басталып, күтпеген жерден полицияның жаппай ұстауларымен аяқталды», — делінген хабарламада. Бейнежазбада Жібек жолы көшесіндегі полиция пунктінің жанында адамдардың көп жиналғаны көрінеді.
NUR.KZ тілшісіне Алматы Полиция департаментінің баспасөз қызметі Алмалы ауданының полицейлері қоғамдық тәртіпті сақтауға және азаматтардың қауіпсіздігін қамтамасыз етуге бағытталған профилактикалық іс-шаралар жүргізгенін хабарлады.
«Полиция мерекелік іс-шараларға, қала тұрғындарының жаппай демалысы мен бос уақытын өткізуіне кедергі жасамайды. Сонымен қатар ішкі істер органдарының басты міндеті — қоғамдық кеңістіктегі барлық қатысушының қауіпсіздігін қамтамасыз ету, құқық бұзушылықтар мен ықтимал оқиғалардың алдын алу», — деп атап өтті ведомствода.
Полиция рейд барысында жасөспірімдерге ерекше назар аударылғанын атап өтті. «Арбат» жаяу жүргіншілер аймағында түнде заңды өкілдерінің еріп жүруінсіз жүрген 28 жасөспірім анықталды. Олардың ата-аналарына қатысты әкімшілік материалдар жиналды.
«Еске саламыз: заңнамаға сәйкес жасөспірімдерге сағат 23:00-ден 6:00-ге дейін заңды өкілдерінің еріп жүруінсіз тұрғын үйден тыс жерде болуға тыйым салынады. Ата-аналарды балалардың бос уақытын ұйымдастыруға жауапкершілікпен қарауға, әсіресе кешкі және түнгі уақытта олардың қайда жүргенін, кімдермен араласатынын біліп отыруға шақырамыз. Балалардың қауіпсіздігі — ортақ жауапкершілік. Полицияның профилактикалық жұмысы ең алдымен құқық бұзушылықтардың алдын алуға, жасөспірімдерді қорғауға және қала тұрғындары мен қонақтарының тыныштығын қамтамасыз етуге бағытталған», — деді Полиция департаментінің баспасөз қызметі.