Алматыда өткен демалыс күндері полиция қызметкерлері жол қозғалысы ережелерінің жүздеген бұзушылықтарын анықтады. Мопед, самокат және басқа да жеке мобильділік құралдарының жүргізушілеріне ерекше назар аударылды, деп хабарлайды infohub.kz сайты.
Мегаполисте апаттылықты төмендетуге және жол қозғалысы ережелерін өрескел бұзушылықтардың жолын кесуге бағытталған профилактикалық рейдтер жалғасуда. Полиция департаментінде атап өткендей, арнайы тұрақтарға 3 мопед, 298 самокат, 1 электровелосипед және 1 мотоцикл қойылды.
Қаланың Жетісу ауданында жол ережелерінің 152 бұзушылығы тіркелді. Олардың бір бөлігі көлік құралдарын пайдалануға және жолаушыларды тасымалдауға қатысты.
Алматы полиция департаменті бастығының орынбасары Ғалым Сарғұлов: «Жолдағы қауіпсіздік әрбір жол қозғалысына қатысушының тәртібіне тікелей байланысты. Сондықтан біздің міндетіміз – жол-көлік оқиғасына әкелуі мүмкін бұзушылықтарды уақытылы анықтау және олардың салдарына жол бермеу. Бақылау тұрақты негізде, әсіресе қозғалыс қарқынды және апаттылық деңгейі жоғары учаскелерде жалғасады. Жүргізушілерді жол қозғалысы ережелерін қатаң сақтауға, өз өміріңіз бен айналаңыздағылардың қауіпсіздігін қатерге тікпеуге шақырамыз», – деді.