Алматы тауларында 1953 жылы туған шетелдік азаматты іздеу жалғасып жатыр. Ол 28 қыркүйекте «Шымбұлақтан» өз бетінше түспек болып, қонақүйге оралмаған. Іздеу-құтқару жұмыстарына 50-ге жуық адам, тікұшақ және жеті дрон жұмылдырылды, деп хабарлайды infohub.kz сайты.
Іздеу Талғар асуының маңында, шамамен 3200 метр биіктікте жүргізіліп жатыр. Ведомство дерегінше, ер адам «Шымбұлақ» арқан жолымен топ құрамында көтерілген соң, әріптестеріне маршрутты жалғыз жалғастырып, қалаға сүйемелдеусіз түсетінін айтқан.
Оның жоғалғаны туралы хабар «112» пультіне 29 қыркүйекте түсті. Сол күні Төтенше жағдайлар министрлігі іздеу-құтқару жұмыстарын ұйымдастырды. Алматының Төтенше жағдайлар департаменті жедел штаб құрды.
Іздеуге ТЖМ қызметкерлері, қалалық Мониторинг және жедел ден қою орталығы, «Барыс» Республикалық құтқару қызметінің құтқарушылары, полицейлер, кинологиялық есеп топтары және «ДСС» еріктілері тартылды. Барлығы сегіз техника бірлігі, жеті ұшқышсыз ұшу аппараты, үш кинологиялық есеп тобы және «Қазавиаспас» тікұшағы пайдаланылуда.
Тікұшақ экипажы Солтүстік Талғар маңындағы, Богданович мұздығы мен оған іргелес шатқалдардағы тау маршруттарын шыңдар мен асулар бағытында тексерді. Жаяу топтар дрондардың қолдауымен бару қиын учаскелер мен тау соқпақтарын тексереді.
Сондай-ақ құтқарушылар бейнебақылау камераларының жазбаларын қарауды жалғастырып, іздеу ауданында болған туристерден сұрау алып жатыр.
Жұмыстар күрделі рельеф, биіктік және жекелеген учаскелердің бару қиындығын ескере отырып, тәулік бойы жүргізілуде.
Бұған дейін «Курсив» Алматы тауларындағы Аюсай шатқалында ата-анасымен серуендеп жүріп адасқан 2015 жылы туған баланы бір тәуліктен астам іздеуден кейін тапқанын жазған. Ол сарқырамадан жоғары, шамамен 2000 метр биіктікте табылып, отбасына тапсырылды. Іздеу жұмыстарына 160-қа жуық адам қатысқан.