16 тамыздан бастап Алматыда көлік тұрағының жаңартылған ережелері күшіне енді. Енді қала тұрғындары үйінен 500 метр радиуста өз көлігіне тегін орын ала алады, деп хабарлайды infohub.kz.
Алматы қалалық мәслихатының шешіміне сәйкес, коммуналдық ақылы тұрақтарды пайдалану енді белгіленген уақытқа емес, минут сайын төленеді. Бұл өзгеріс қаладағы барлық коммуналдық тұрақтарға қатысты.
Тротуарлық типтегі тұрақтарда алғашқы бес минут тегін. Бұл уақыт жолаушыларды отырғызу немесе түсіру, сондай-ақ көлікті тиеу немесе түсіру үшін беріледі. Егер көлік ұзағырақ тұрса, төлем жеңілдік мерзімі аяқталған сәттен бастап есептеледі, бірақ алғашқы бес минут тоқтау ескеріледі.
Сонымен қатар, жергілікті тұрғындарға тегін тұраққа тұру мүмкіндігі пайда болды. Көппәтерлі үйлерде тұратын меншік иелері мен жалға алушылар өз пәтерінен 500 метр радиуста таңдаған бір коммуналдық тұрақты тегін пайдалана алады.
Құжатта: «Тегін пайдалануды ұсыну басқарушы ұйымның интернет-ресурсы немесе азаматтардың барлық өтініштерін қабылдау мен өңдеудің бірыңғай платформасы арқылы берілген өтініш негізінде жүзеге асырылады», — деп көрсетілген.
Маңыздысы, тегін тұрақ бір пәтерге бір көлікке беріледі. Алайда бұл жеңілдік жерасты, айырбастау, көпдеңгейлі және механикаландырылған тұрақтарға қолданылмайды.
Сондай-ақ, тұрақтарда нөмірін анықтау қиын немесе оны жасыруға немесе өзгертуге болатындай етіп орнатылған көліктерді қалдыруға тыйым салынады.
Мегаполис тұрғындары тұрақ ақысын кейін төлей алады. Төлемді көлік тұраққа қойылған күні сағат 23:59-ға дейін жасауға болады. Тротуарлық типтегі коммуналдық тұрақтардың өзі енді 8:00-ден 20:00-ге дейін жұмыс істейді.