Қытайлық электрокөліктерді сатып алып, қайта сатумен айналысқан қазақстандық кәсіпкерлер автосалон иесінің алдауынан 700 млн теңге жоғалтқандарын мәлімдеді, деп хабарлайды infohub.kz сайты.
Алматыдағы қытай көліктерін қайта сатумен айналысатын 40 кәсіпкер автосалон иесінің алаяқтығының құрбаны болғандарын айтады. Олардың сөзінше, оларға көліктерді сатып, түскен пайданы бөлісуді уәде еткен.
«Маған қоңырау шалып, Changan CS55 Plus керек екенін, Шымкентте клиенттер барын айтты: "Ақшаны 3-4 күнде қайтарамыз, клиенттер дайын тұр". Жарайды, келістік. Екі көлікті әкелдік. Олар сатылды. Бұл 12 маусымда болды. Қазір тамыз, екі ай өтті. Әлі күнге дейін ақша жоқ», — деді кәсіпкер Нұржан Боштай.
Одан кейін, сатушының айтуынша, оның көліктері қайта сатыла берген. Осы уақыт ішінде көліктің үш иесі ауысқан, қазір көлік кепілде тұр. Дәл осындай мәселемен кемінде 40 сатушы кезіккен, олардың барлығы бір автосалонмен жұмыс істеген.
«Біз автосалон иесінің бұрын да алаяқ болғанын білдік. Егер ол өзі хабарласқанда, біз оған ақша мен көлік бермес едік. Сондықтан ол өз орнына агенттерін жіберген. Біздің білуімізше, оның үш автосалоны болған. Ол адамдарды бір жылдан астам уақыт бойы алдап жүр деп ойлаймын», — деді кәсіпкер Әділ Бекжан.
Сатушылардың айтуынша, автосалон аумағы екі апта бұрын мөрленген. Оған дейін бір ай бойы мұнда сатылымға қойылған қытай көліктері тұрған. Қазір қақпалар жабық, аумақта көлік жоқ.
Кәсіпкерлер полицияға арызданған, сол күні автосалон иесі ұсталған. «Күдікті ұсталып, уақытша ұстау изоляторына қамалды. Аса ірі көлемде жасалған алаяқтық фактісі бойынша қылмыстық іс қозғалды. Қазіргі уақытта қылмысқа қатысы бар басқа адамдардың шеңбері анықталуда», — деді Алматы қалалық ПД ресми өкілі Салтанат Әзірбек.
Айта кетейік, автосалон иесіне жеті жылға дейін бас бостандығынан айыру жазасы қауіп төніп тұр.