Қазақстанда соңғы әскери-көліктік Ан-26 ұшағы өзінің қорытынды рейсін жасады — елдегі осындай соңғы ұшақ салтанатты түрде зейнетке шығарылды, деп хабарлайды infohub.kz сайты.
NUR.KZ агенттігінің Қазақстан Республикасы Ұлттық ұланының баспасөз қызметіне сілтеме жасап хабарлауынша, ұландықтар Қазақстандағы соңғы әскери-көліктік Ан-26 ұшағын шығарып салды. Ұшақ өзінің соңғы рейсін орындады.
«Әуе кемесінің тарихы 1981 жылы басталды. Ұшақ Киев авиация зауытында жасалып, алғашқы он жыл КСРО Мемлекеттік қауіпсіздік комитетінің Шекара әскерлері авиациясында қызмет етті. Оның негізгі базасы Қазақ КСР аумағында болды. Ан-26 оңтүстік шекараларды қорғау, әскери қызметшілер мен жүктерді тасымалдау міндеттерін орындауға пайдаланылды. 1992 жылдан бастап Ан-26 Ұлттық ұлан авиациясының құрамында қызметін жалғастырды. Пайдалану жылдарында ұшақ жеке құрам мен жүктерді тасымалдау міндеттерін орындап, басқа да қызметтік тапсырмаларға тартылды», — деді баспасөз қызметінде.
Ан-26 пайдалану жылдарында әскери қызметшілер мен жүктерді сенімді түрде тасымалдап, өзінің сенімділігі мен қызметтік рейстерді орындауға дайындығын үнемі дәлелдеп отырғаны атап өтілді. Ұлттық ұлан авиациясында қызмет еткен уақытта Ан-26 8400 сағат ұшты. Оны пайдаланудың жалпы мерзімі 44 жылды құрады.
Соңғы рейс осы ұшақты ұзақ жылдар басқарған экипаж үшін де ерекше болды. 3656 әскери бөлімінің ұшқышы подполковник Медет Сейтов 15 жыл бойы Ан-26-да ұшты. Ол осы әуе кемесінің экипаж құрамындағы соңғы ұшқыш-нұсқаушысы болды. Қорытынды рейс аяқталған соң экипаж мүшелері қызметінің едәуір бөлігін бірге өткізген ұшақпен ерекше сезіммен қоштасты.
«Ан-26 пайдаланудан шығарылуымен Қазақстанның әскери авиациясында осы типтегі ұшақтардың тарихы аяқталды», — деп қосты Ұлттық ұланда.