Anthropic компаниясы әзірлеген Claude жасанды интеллект моделі генетикалық деректерді автономды талдау барысында бактериофагтардың — бактерияларды зақымдайтын вирустардың — ДНҚ-сында бұрын белгісіз ферменттік жүйені анықтады. Бұл туралы infohub.kz сайты хабарлайды.
Жаңа жүйе массивтермен байланысқан кері транскриптазалар немесе ART (array-associated reverse transcriptases) деп аталды. Оның басты ерекшелігі — фермент генінің жанында қайталанатын ДНҚ фрагменттерінің болуы, бұл құрылымы жағынан атақты CRISPR геномын өңдеу технологиясына ұқсайды.
Тәжірибеге шамамен 950 ЖИ-агент қатысып, олар 21,5 сағат бойы адамның тікелей араласуынсыз 1,9 миллиард ақуыз кластерінен тұратын дерекқорда автономды іздеу жүргізді. Содан кейін компания ғалымдары зертханалық сынақтар өткізіп, табылған құрылымның бар екенін растады.
Ашылымның бірегейлігіне қарамастан, сарапшылар мен әзірлеушілердің өздері ART жүйесінің нақты функциялары әлі анықталмағанын атап өтеді. Қазіргі таңда оның CRISPR сияқты гендерді мақсатты өңдеуге қолданылуы мүмкін бе, белгісіз.
Массачусетс технологиялық институты мен Гарвард университеті жанындағы Брод институтының молекулалық биологы Фэн Чжан мұндай құрылымдардың табылуы ғылым үшін үлкен қызығушылық тудыратынын және ЖИ-агенттердің биологиялық зерттеулердегі жоғары әлеуетін көрсететінін атап өтті.