Ақтөбеде жергілікті тұрғыннан 2 млн теңге қорқытып алуға күдікті үш жас жігіт ұсталды. Тергеу деректері бойынша, күдіктілер алдымен жәбірленушінің ұялы телефонын ұрлаған, ал бірнеше айдан кейін одан ірі көлемде ақша талап еткен, деп хабарлайды infohub.kz сайты.
Ішкі істер министрлігіндегілердің айтуынша, полицияға жас жігіт өзіне қауіп төндіріп, 2 млн теңге беруді талап еткені туралы арызбен жүгінген.
«Алдын ала анықталғандай, 2025 жылдың соңында күдіктілер жәбірленушінің телефонын иеленген. Кейін олар одан тағы 2 млн теңге талап еткен. Ақшаны тапсыру кезінде күдіктілер полиция қызметкерлерімен қылмыс үстінде ұсталды», — деп мәлімдеді ІІМ-де.
Ұсталғандар — үш жас жігіт. Қазіргі уақытта қорқытып алу фактісі бойынша сотқа дейінгі тергеу жүргізілуде.
Күдіктілердің бірінің тұрғылықты жерінен тінту кезінде полицейлер травматикалық тапанша, пышақ және 16 калибрлі тегіс ұңғылы аңшылық мылтыққа арналған патронды тәркіледі. Сараптамалар тағайындалды, нәтижелері бойынша құқықтық баға беріледі.
Тергеушілер оқиғаның барлық мән-жайын анықтауды жалғастыруда.
Бұған дейін «Курсив» Жамбыл облысында ер адамның атылып өлтірілгенін жазған болатын. Полиция деректеріне сүйенсек, кісі өлтіру фактісі бойынша қылмыстық іс қозғалып, күдікті ұсталып, уақытша ұстау изоляторына қамалған. Қайтыс болған адамның туыстары ер адамға бұған дейін бірнеше рет қауіп төндірілгенін айтып, объективті тергеу жүргізуді сұраған.