Астанада полиция тоғыз жасар баланың үстіне жаттығу кезінде футбол қақпасы құлаған оқиға бойынша қылмыстық іс қозғады. Бұл туралы infohub.kz сайты хабарлайды.
Елордалық полиция департаментінің мәліметінше, оқиға бала қақпаға ілініп, құрылым оның үстіне құлаған кезде болған. Салдарынан бала жарақат алып, қажетті медициналық көмек көрсетілуде.
Полицияда атап өткендей: «Қазіргі уақытта тергеу амалдары жүргізілуде, оқиғаның барлық мән-жайы анықталуда. Бала жарақат алды, оған қажетті медициналық көмек көрсетілуде».
Бұған дейін оқиға 10 тамызда сағат 19:30 шамасында Астанадағы Футбол үйінің аумағындағы футбол алаңында болғаны хабарланған болатын. Онда Қазақстан футбол федерациясы орналасқан. 2017 жылы туған бала зардап шекті. Журналист Аслан Қаженовтің ақпараты бойынша, жарақат алған бала реанимацияға жеткізілген.
Кейін ҚФФ оқиғаның болғанын растап, алаңның жеке футбол мектебіне жаттығу өткізу үшін жалға берілгенін хабарлады. Федерация нысан мен жабдықтың техникалық жағдайына ішкі тексеру бастап, құзырлы органдарға көмектесуге дайын екенін мәлімдеді.