Жаңа оқу жылында елорда мектептері 35 мыңға жуық бірінші сынып оқушысын қабылдауға дайындалуда, бұл өткен жылмен салыстырғанда төрт мыңға артық, деп хабарлайды infohub.kz сайты.
Бірінші сыныпқа құжат қабылдау 28 мамырда басталып, 31 тамызға дейін жалғасады. Астана қаласы Білім басқармасының мәліметінше, қазірдің өзінде 30 мыңнан астам бала қабылданған.
Салыстыру үшін: өткен оқу жылында бірінші сыныпқа 31 мың бала қабылданған болатын. 2025–2026 оқу жылының басында елордада 206 мектеп жұмыс істеп, онда 310 мыңнан астам оқушы білім алды.
Сонымен қатар, 2025 жылы Астанада 28 мың орынға арналған жеті жаңа мектеп ашылды. Жалпы, оқу жылы ішінде 15 жаңа білім ордасын пайдалануға беру жоспарланған болатын.
Ата-аналар құжаттарды «электрондық үкімет» порталы арқылы онлайн немесе мектепке жеке барып тапсыра алады. Қабылдау үшін қажетті құжаттар: ата-ананың немесе заңды өкілдің өтініші; «Профилактикалық егу картасы» (№065/у нысаны); «Баланың денсаулық паспорты» (№052-2/у нысаны); баланың 3×4 см көлеміндегі цифрлық фотосуреті. Құжаттарды қағаз түрінде тапсырған кезде ата-ананың немесе заңды өкілдің жеке куәлігінің көшірмесі де қажет болады.
Бұған дейін Қазақстанда 450 мыңға жуық балаға мектепке дайындыққа көмек берілетіні хабарланған болатын. Қолдаудың ең төменгі мөлшері бір балаға 50,8 мың теңгені құрайды.