Қазақстан премьер-лигасының 21-турында «Астана» өз алаңында «Оқжетпесті» 2:1 есебімен жеңіп, қола медаль үшін бәсекеде қарсыластарынан айырмасын сегіз ұпайға жеткізді, деп хабарлайды infohub.kz.
Кездесу басталар алдында командалар бұрынғы танымал футболшы, «Астана» жүйесінде жас буынды дайындаған Александр Лисиннің есімін бір минут үнсіздікпен еске алды.
Матчта есепті 20-минутта қонақтар ашты: украиналық қорғаушы Борис Лотоцкий алаң иелерінің қақпасына доп соқты. Алайда үзіліске дейін «Астананың» хорват легионерлері Карло Бартолец пен Марин Томасов командасын алға шығарды. Григорий Бабаян шәкірттері финалдық ысқырыққа дейін жеңіс есебін сақтап қалды.
Турдың параллельді ойындарында Семейдің «Елімайы» Павлодардың «Ертісін» 3:1 есебімен ұтса, «Атырау» мен «Ақтөбе» тең ойнады (1:1), «Алтай» мен «Қызылжар» 2:2 есебімен тең түсті, «Ордабасы» «Жетісуды» 4:0 есебімен тас-талқан етті, ал «Каспий» «Ұлытауды» минималды есеппен (1:0) жеңді.
«Қайрат» пен «Тобыл» қатысатын ойындар еурокубок ойындарына байланысты кейінге шегерілді, олардың күнтізбедегі орны кейінірек анықталады.
Чемпионаттың келесі, 22-туры 14-15 тамызда өтеді. Сенбіде «Қайрат» — «Ұлытау», «Ордабасы» — «Алтай», «Жеңіс» — «Жетісу» және «Қайсар» — «Ақтөбе» матчтары өтеді. Жексенбіде жанкүйерлер «Қызылжар» — «Астана», «Атырау» — «Оқжетпес», «Ертіс» — «Тобыл» және «Каспий» — «Елімай» кездесулерін тамашалайды.