Атырауда әлеуметтік желілерде жол қозғалысы ережелерін өрескел бұзған видеоларды жариялаған той кортежінің қатысушылары жазаға тартылды, деп хабарлайды infohub.kz сайты.
Ішкі істер министрлігінің мәліметінше, полиция қызметкерлері әлеуметтік желілерді мониторингтеу кезінде Атыраудағы той кортежінің қатысушыларының ЖҚЕ өрескел бұзғанын көрсететін бейнематериалдарды анықтаған. Тексеру барысында Әбілқайыр хан даңғылында Volkswagen Polo және Lada Priora автокөліктерінің жүргізушілері мен жолаушылары жол қозғалысы қауіпсіздігіне және оның басқа қатысушыларына нақты қауіп төндіретін әрекеттер жасағаны анықталды. Тексеру іс-шараларының нәтижесінде патрульдік полиция қызметкерлері оқиғаның барлық қатысушыларының жеке басын анықтады.
Барлығы маневр жасау ережелерін бұзғаны, белгіленген талаптарды бұза отырып көлік құралдарын басқарғаны және пайдаланғаны, қауіпсіздік белдіктерін тақпағаны, сондай-ақ авариялық жағдай туғызғаны үшін 8 адам жауапкершілікке тартылды. Атырау облысының полиция департаменті той кортеждері мен басқа да жаппай іс-шаралар кезінде жол қозғалысы ережелерін кез келген әдейі бұзу азаматтардың өмірі мен денсаулығына қауіп төндіретінін еске салады. Осындай құқыққа қарсы әрекеттер үшін кінәлі тұлғалар Қазақстан Республикасының қолданыстағы заңнамасына сәйкес жауапкершілікке тартылады.