15 тамызда Қазақстанның үш қаласында қолайсыз метеорологиялық жағдайлар күтіледі, деп хабарлайды infohub.kz сайты.
Синоптиктердің мәліметінше, қолайсыз метеожағдайлар (ҚМЖ) Алматы мен Атырауда, ал түнде Өскеменде болжанады.
Мамандардың түсіндіруінше, қолайсыз метеожағдайлар тымық ауа райы, әлсіз жел, тұман және температуралық инверсияның тұтасуы кезінде пайда болады. Нәтижесінде ластаушы заттар атмосфераның жерге жақын қабатында жиналып, ауа сапасының нашарлауына әкелуі мүмкін.
Синоптиктер мұндай кезеңдерде денсаулыққа теріс әсер ету қаупі артатынын, әсіресе созылмалы аурулары бар адамдар үшін қауіпті екенін ескертеді.
Ауаның ластану деңгейіне желдің жылдамдығы, жауын-шашын, ылғалдылық және ауа температурасы әсер етеді.
Тұрғындарға көшеде, әсіресе автокөлік жолдары мен басқа да ластану көздерінің жанында болу уақытын қысқарту ұсынылады. Балалар мен жүкті әйелдерге ұзақ серуендеуден бас тартуға кеңес беріледі.
Тыныс алу және жүрек-қан тамырлары жүйесі аурулары бар адамдарға, сондай-ақ аллергиясы барларға қажетті дәрі-дәрмектерді өзімен бірге алып жүру ұсынылады. Мамандар ашық ауадағы физикалық белсенділікті шектеуді және мүмкіндігінше сабақтарды жабық үй-жайларға ауыстыруды кеңес береді.
Бұған дейін «Курсив» Қазақстанның көптеген аймақтарында 15 тамызға дауылды ескерту жарияланғанын жазған болатын. Синоптиктер найзағай, бұршақ, қатты жел, шаңды дауыл және +43°С-қа дейін қатты ыстық болжап отыр, деп хабарлады «Қазгидромет» РМК.