Австрияда мұздықтың еруіне байланысты 60 жыл бұрын жоғалған рюкзак 86 жастағы альпинистке қайтарылды. Бұл туралы infohub.kz сайты хабарлайды.
Өткен жылы шілде айында Тироль аймағындағы Зульцтальфернер мұздығында, теңіз деңгейінен 2955 метр биіктікте, бір серуендеуші мұз арасынан мұз балтасы, камера және темекі тартатын құбыр сияқты заттарды тапқан. Бұл заттар 1950-1960 жылдары қолданылған болуы мүмкін.
Австрия полициясы тергеу барысында рюкзак ішіндегі тозығы жеткен құжаттар арқылы иесінің есімін анықтап, оны тауыпты. Оқиға 1963 жылдың тамыз айында болған: ер адам достарымен бірге мұздықты кесіп өтіп бара жатып, жарыққа құлаған. Топ арқанмен байланғандықтан, достары оны суырып ала алған. Полицияның айтуынша, салмағын жеңілдету үшін ол рюкзагын шешіп, жарыққа лақтырған.
Қазір ер адам ауырғандықтан заттарды өзі ала алмай, олар ұлы арқылы қайтарылған. Полиция оның есімін жарияламады.
Ғалымдардың пікірінше, адам әрекетінен туындаған жаһандық жылыну еуропалық мұздықтардың жедел еруіне әкеліп, соңғы онжылдықтарда көптеген жәдігерлер, көне экожүйелер мен адам қалдықтарының ашылуына себеп болды.
Мысалы, 2015 жылы Бірінші дүниежүзілік соғыс кезінде Ақ соғыста итальяндық әскерлер паналаған казарма табылды. Ал 1991 жылы неміс серуендеушілері Этцаль Альпісіндегі мұздықта 5300 жылдық мумияланған аңшының денесін тапқан болатын. «Отци» деп аталатын бұл мумия қазір Больцано мұражайында сақтаулы.