2026 жылдың бірінші жартыжылдығы қорытындысы бойынша Алматы Қазақстандағы автокөлік құралдарын өндірудің ірі орталығына айналды. Мұнда 488,2 млрд теңгеге өнім шығарылды, бұл республикалық жалпы көлемнің 42,3%-ын құрайды. Қостанай облысымен (438,7 млрд теңге, 38%) бірге екі өңірге автомобильдер, тіркемелер мен жартылай тіркемелер өндірісінің 80%-дан астамы тиесілі, деп infohub.kz хабарлады.
Үшінші орында Қарағанды облысы – 110,9 млрд теңге (9,6%). Одан кейін Абай (56,3 млрд теңге) және Ақмола (43,2 млрд теңге) облыстары тұр. Бұл бес өңір бірігіп елдегі автомобиль өндірісінің 98,6%-ын қамтамасыз етеді. Қалған аймақтарда көлем айтарлықтай төмен: Астана – 11,2 млрд теңге, Батыс Қазақстан – 2,7 млрд теңге, Павлодар – 1,4 млрд теңге.
Автомобиль өнеркәсібі көшбасшы өңірлер экономикасында маңызды рөл атқарады. Алматыда оның үлесі машина жасауда 82,9%, өңдеу өнеркәсібінде 43,9% және жалпы өнеркәсіп өндірісінде 36,4% құрады. Қостанай облысында бұл көрсеткіштер тиісінше 79,5%, 39% және 27,9%. Автөнеркәсіп Абай (67,4%), Қарағанды (36,4%), Ақмола (27,7%) және Батыс Қазақстан (10,3%) облыстарының машина жасау саласына елеулі үлес қосады.
Қазақстанда жеңіл және жүк автомобильдері, автобустар мен арнайы техника шығару бойынша 11 кәсіпорын жұмыс істейді. 2025 жылы жалпы инвестиция көлемі 346 млрд теңгеден асатын Astana Motors Manufacturing Kazakhstan және KIA Qazaqstan зауыттары іске қосылды. Олардың автоматтандырылған желілерінде 119 өнеркәсіптік робот жұмыс істейді. Жүк техникасы сегменті де дамып келеді: Scania және Howo өндірістерінен басқа, 2026 жылдың төртінші тоқсанынан бастап Hyundai Trans Auto алаңында жылына 500 Volvo седелка тартқышын шығару жоспарлануда. Barys Truck Manufactory компаниясы XCMG-мен бірлесіп электрлі жүк тартқыштар шығару жобасын іске асыруда.
Қазақстан Президенті Қасым-Жомарт Тоқаевтың Қытайға мемлекеттік сапары барысында қол жеткізілген келісімдер қосымша серпін беруі тиіс. Олар Li Auto, OMODA және JAECOO автомобильдерін өндіруді ұйымдастыруды, SITRAK ұшқышсыз седелка тартқыштарын шығаруды, сондай-ақ BYD-мен бірлесіп жоғары жылдамдықты зарядтау станциялары желісін дамытуды көздейді.
Машина жасауды дамыту экономиканы диверсификациялау бойынша мемлекеттік саясаттың басым бағыты болып қала береді. Президент Қасым-Жомарт Тоқаев заманауи өндірістерді құру мен озық технологияларды, соның ішінде ұшқышсыз көлік пен арнайы автомобиль техникасын енгізудің маңыздылығын бірнеше рет атап өтті. Жаңа инвестициялық жобалар Қазақстанның аймақтағы автомобиль жасау орталықтарының бірі ретіндегі позициясын нығайтуға бағытталған.