Қазақстан футбол Бірінші лигасының 18-туры Алматыдағы жаппай электр жарығының өшуіне байланысты үш күнге созылды. Турдың қорытынды ойыны сенбі күні таңертең өтті: алматылық «Хан-Тенгри» жасанды төсенішті стадионда «Арысты» қабылдады. Жұма күні блэкаутқа байланысты кейінге шегерілген кездесу 0:0 есебімен аяқталып, көрермендерді қауіпті сәттердің көптігімен қуанта алмады, деп хабарлайды infohub.kz.
13–15 тамызда өткен турдың басқа ойындарында басты оқиға — чемпионат көшбасшысы қарағандылық «Шахтердің» «Актобе-М» жастар командасын 6:1 есебімен тас-талқан етуі болды. Қонақтар сапында Артем Литош хет-трик жасап, мергендер тізіміндегі көшбасшылығын нығайтты: енді оның еншісінде 17 ойында 17 гол. Снайперлер жарысында екінші орында «Академия Онтустиктен» Алихан Әли — 9 доп.
«Кайрат-Жастар» ойын дағдарысын жалғастыруда: команда 24 шілдеден бері жеңіске жете алмай, шымкенттік «Академия Онтустикпен» 0:0 есебімен тең ойнап, тағы да ұпай жоғалтты. Ал «Шахтер» керемет формада: соңғы алты ойында 16 гол соқты.
Турдың қалған нәтижелері: Екібастұздың «Батыры» оралдық «Жайықты» 3:1 есебімен ұтты, «Тараз» бен «Туран» тең түсті (0:0), Ақтаудағы «Каспий-М» Семейдің «Елимай-М» командасынан басым түсті (2:1), ал «Астана-М» «Тобыл-М»-ге ірі есеппен жол берді (0:4).
Бірінші лиганың келесі, 19-туры 20-21 тамызда өтеді.