2026 жылдың 1 қыркүйегінен бастап Маңғыстау облысында ерекше қорғалатын табиғи аумақтарға, оның ішінде әйгілі Бозжыра шатқалына барудың жаңа тарифтері мен ережелері енгізіледі. Тиісті қаулыны әкімдік 20 шілдеде бекітті, деп хабарлайды infohub.kz сайты.

Өзгерістер «Қызылсай» мемлекеттік өңірлік табиғи паркі мен Бейнеу ауданының ормандар мен жануарлар дүниесін қорғау мекемелеріне әсер етеді. Жаңа баға қолданылатын танымал орындар тізіміне Бозжыра, Тұзбайыр, Қызылқұп шатқалдары және Боқты тауы кірді.

Ақы тек кіру үшін ғана емес, сонымен қатар жекелеген қызметтер үшін де алынады: туристік жолдар, кемпингтерде орналасу, көлікпен кіру, фото және бейнетүсірілім. Құны айлық есептік көрсеткішке (АЕК) негізделген.

Мәселен, туристік жолмен серуендеу адам басына тәулігіне 0,2 АЕК (865 теңге), кемпингте немесе шатырлы лагерьде орналасу — 0,1 АЕК (шамамен 433 теңге), фототүсірілім — 4,4 АЕК (19 030 теңге), кино және бейнетүсірілім — 8,7 АЕК (37 627,5 теңге) тұрады. Экскурсия ұйымдастыру 1,8 АЕК (7 785 теңге), гид қызметі — 0,9 АЕК (3 893 теңге). Туристік шатырды жалға алу — 0,7 АЕК (3 028 теңге), ұйықтайтын қап — 0,3 АЕК (1 298 теңге).

Автокөліктер үшін жеке тарифтер қарастырылған: мотоцикл, мопед немесе квадроциклмен кіру үшін 0,4 АЕК (1 730 теңге), жеңіл автомобиль — 0,7 АЕК (3 028 теңге), микроавтобус немесе жүк көлігі — 2,7 АЕК (11 678 теңге), автобус — 5 АЕК (21 625 теңге) төлеуге тура келеді. Сондай-ақ автомобиль тұрағы үшін ақы белгіленген — 0,2 АЕК (865 теңге).

Мысалы, екі ересек пен 6-17 жас аралығындағы екі оқушыдан тұратын отбасы жеңіл көлікпен келіп, түнеп, туристік жолдарды пайдаланса, шамамен 7 787 теңге төлейді. Шатырды жалға алса, сома 10 815 теңгеге дейін өседі.

Кейбір азаматтар аумақтарға тегін кіре алады: зейнеткерлер, мүгедектігі бар адамдар, Ұлы Отан соғысының ардагерлері, басқа мемлекеттер аумағындағы ұрыс қимылдарының ардагерлері, еңбек ардагерлері және ҰОС қатысушыларына теңестірілген өзге де санаттар. Алты жасқа дейінгі балалар да ақыдан босатылады. Мектеп оқушылары мен 6-17 жас аралығындағы балаларға 50% жеңілдік, күндізгі оқу нысанындағы студенттерге — 25% жеңілдік қарастырылған. Шетел азаматтары екі есе көп төлейтін болады.

Қаулы сондай-ақ қорғалатын аумақтарда болу ережелерін, оның ішінде жүру, демалу және табиғи ресурстарды пайдалану тәртібін бекітеді. 2026 жылдың 1 қыркүйегіне дейін бұрынғы тарифтер мен ережелер қолданылады.

Жаңалық әлеуметтік желілерде қызу пікірталас тудырды. Пайдаланушылар, әсіресе, ақының тек шетелдіктер үшін емес, жергілікті тұрғындар үшін де енгізілуіне таңданыс пен наразылық білдіруде. «Мына ақы қандай қажеттілікке және кімнің қалтасына түседі екен», «Қорқынышты. Осы қарқынмен жақында теңізге тегін жақындай алмаймыз — тек алдын ала жазылып, кіру ақысын төлеп», «Теңізге қарауға да ақы төлетіңдер», — деп жазады пайдаланушылар.

Бұған дейін «Каспий» әлеуметтік-кәсіпкерлік корпорациясы Маңғыстау облысында глэмпингтер салуға 500 млн теңге тартатыны хабарланған болатын.