Алматы қалалық мәслихатының бұрынғы депутаты Игорь Проценко өзінің «Торнадо PLUS» жиһаз компаниясындағы үлесін сатуға дайын екенін мәлімдеді. Кәсіпорын нарықта 1994 жылдан бері жұмыс істеп келеді, алайда соңғы кездері сатуда елеулі қиындықтарға тап болды, деп хабарлайды infohub.kz сайты.

Кәсіпкер Facebook-тегі парақшасында компания тарихында алғаш рет банк несиесін уақытында өтей алмағанын айтты. Оның айтуынша, банк қарызды қайта құрылымдауға дайын, бірақ басты мәселе – тапсырыстардың болмауы.

«Өткен жылды біз өте жақсы аяқтадық. Корпоративтік сектордан бөлшек саудаға басымдық бердік, көлемдер үш есеге жуық өсті, компания штаты 146 адамға жетті. Жаңа жылдан бастап біз жұмыс істеген бөлшек сауда желісінде сатылым күрт төмендеді. Онымен бірге біз де құлдырадық», – деді Проценко.

Кәсіпкер сәуір айында-ақ «Торнадо PLUS» компаниясындағы 100% үлесін сату ниеті туралы хабарлаған болатын. Қазір ол бірнеше нұсқаны қарастыруда. Оның бірі – несиелерді жабу үшін 4,5 мың шаршы метр цехты қоса алғанда, өндірістік базаны сату. Алайда бұл жағдайда, оның айтуынша, құны шамамен 700 млн теңге болатын жабдық мәселесі шешілмей қалады, ал болашақта цех жұмысын қайта бастау үшін үй-жайды жалға алуға тура келеді.

Кәсіпкер жаңа серіктестер іздеп, оларға бизнес үлесін сатуға бейім. Проценко жаңа серіктеспен бірге компанияны жаңартып, жаңа бағыт – өндірістік үй-жайларды жалға беруді игергісі келеді. Ол 1 гектар аумақтағы меншікті өндірістік базаға ие.

«Біз қолданыстағы өндірістік кешенді біртіндеп шағын өнеркәсіптік паркке айналдырғымыз келеді. Тиісті мәртебе бізде бар. Өндіріс сақталып, кешеннің негізгі бизнесіне айналады. Бірақ сонымен қатар біз тұрақты әрі болжамды бағытқа – өндірістік, қойма және кеңсе үй-жайларын жалға беруге көңіл бөле бастаймыз. Қазір бізде осындай алаңдардың шамамен 4,5 мың шаршы метрі бар. Тағы шамамен 3,2 мың шаршы метр салудың дайын жобасы бар», – деді Игорь Проценко.

Жоспарлар жүзеге асқан жағдайда кәсіпкер бірнеше жыл ішінде бүкіл активтің капитализациясын 2,5–3 есеге арттыруды көздеп отыр.

Айта кетейік, «Торнадо PLUS» жиһаз компаниясының негізін қалаушы үш жыл бойы Алматы қалалық мәслихатының депутаты болды. Ол кәсіпкерлікті дамыту жөніндегі түрлі салалық және аймақтық ұйымдардың құрамына кірді. 2026 жылдың мамыр айында ол мәслихат депутаты өкілеттігін өз еркімен тоқтатты.

Бұған дейін Қарағанды облысының депутаты АҚШ-тан суару жүйелерін шығаратыны хабарланған болатын.