Америкалық Chevron, британдық Shell, сондай-ақ қытайлық Sinopec пен CNOOC Қазақстанда жаңа геологиялық барлау консорциумын құруға қызығушылық танытты. Осы консорциум аясындағы инвестиция көлемі шамамен $500 млн деп бағаланып отыр, деп хабарлайды infohub.kz сайты.
Бұл туралы «ҚазМұнайГаз» басқарма төрағасының бірінші орынбасары Құрманғазы Ысқазиев мәлімдеді, деп жазады LS.
Оның айтуынша, компаниялар тек сейсмикалық барлау жұмыстарын жүргізуді ғана емес, кейіннен іздестіру ұңғымаларын бұрғылауды да қарастырып отыр. Олардың тереңдігі 5,5-тен 10 км-ге дейін жетуі мүмкін. Салыстырмалы түрде, ірі кен орындарындағы ұңғымалардың қазіргі ең үлкен тереңдігі 5,5 км-ге жетеді.
«Chevron мен Shell бастаған батыс компаниялары, сондай-ақ екі қытайлық компания – Sinopec пен CNOOC – қатысуға ниет білдірді. Біз тек сейсмикалық барлауды ғана емес, кейіннен іздестіру ұңғымаларын бұрғылауды да қарастырып отырмыз», – деді Ысқазиев.
Ол қазіргі таңда жекелеген инвестицияларды көздейтін 23 жоба бойынша министрліктермен келіссөздер жүргізіліп жатқанын нақтылады. Бұл ретте тікелей бұрғылауға салынатын күрделі қаржы одан да жоғары болады. Шамамен $500 млн – жаңа консорциум аясындағы болжамды инвестиция.
Басылымның мәліметінше, консорциумды 2026 жылдың соңына дейін құру жоспарланып отыр.
Төрт әлеуетті қатысушының барлығы да Қазақстанда жұмыс істеп жатыр және ірі мұнай кен орындарын игерумен айналысатын басқа да консорциумдарға кіреді.
Жалпы елде 350-ден астам көмірсутек кен орны бар. Игеріліп жатқан мұнай кен орындарының көпшілігі ескірген болып саналады. Осы жағдайда Қазақстан мұнай өндіруді сақтап, одан әрі ұлғайту үшін геологиялық барлау жұмыстарын кеңейтуді көздеп отыр.