Қазақстан құрамасының шабуылшысы Дастан Сатпаев ағылшындық «Бернлиге» жалға берілуіне алғаш рет түсініктеме берді. «Қайрат» түлегі маусым айында алматылық клубтан кетіп, «Челси» ойыншысы атанған еді. Алайда лондондықтар маусым алдындағы дайындықтан кейін 18 жастағы футболшыны Англияның екінші дивизионы — Чемпионшипте өнер көрсететін «Бернлиге» бір жылға жалға берді, деп хабарлайды infohub.kz.
Сатпаев мұндай тәжірибе өзіне пайдалы болатынына сенімді. «Бұл мен үшін жақсы әрі дұрыс қадам деп ойлаймын. Мен бейімделіп, Чемпионшипте қалай ойнайтынын көремін. Бұл ағылшын футболына жақсырақ үйренуге көмектеседі. Маған тек жұмыс істеп, жетілу керек», — деді шабуылшы клубтың баспасөз қызметіне берген сұхбатында.
Қазақстандық футболшы жаңа командаға бейімделу жайлы да айтты. Оның айтуынша, әріптестерімен және бас бапкері — бельгиялық Ник Хайенмен қарым-қатынас жақсы қалыптасқан. «Алғашқы күндер тамаша өтті. Барлық жігіттер мейірімді, үнемі жағдайымды сұрап, бірдеңе керек пе деп жүреді. Сондықтан мен мұнда болғаныма және клубтың бір бөлігі болғаныма қуаныштымын. Әрқашан оларға көмектесуге дайынмын, олар да маған көмектеседі. Ал егер бірдеңені қате жасасам, олар әрқашан жақсару үшін нені түзетуге болатынын айтады. Бапкер өте жақсы. Бізде жағымды қарым-қатынас қалыптасты. Ол менің ауысуыма қуанышты екенін айтады. Бапкердің мұны айтуы өте маңызды. Сондықтан маған тек дамып, алға жылжу керек», — деді Сатпаев.
Чемпионшип пен Англия Кубогының тығыз кестесі шабуылшыны қорқытпайды. Керісінше, ол әр үш-төрт күн сайын өтетін матчтар ойын тонусын сақтауға көмектеседі деп санайды. Сатпаев «Қайраттағы» және құрамадағы жетістіктеріне тоқтап қалмайтынын атап өтті. «Әрине, бұл жағымды, бірақ менің қолымнан келетінінің бәрі емес. Мен жақсырақ ойнай аламын. Осы бағытта жалғастыра берсем, жаңа рекордтар орнатуым мүмкін», — деді футболшы.
Қазір Сатпаев Англияда тұрғын үй іздеп жүр. Тұрмыстық мәселелер шешілгеннен кейін ол толығымен футболға назар аударады. «Кейде отбасым Лондонға ұшып келеді деп жоспарлап отырмыз. Мен оларды күтемін. Бірақ әзірге маған тұрғын үй табу керек, сонда мен толық дайын боламын», — деп қосты ол. Сұхбатында «Бернлидің» жаңа ойыншысы қазақстандық жанкүйерлерге қолдау көрсеткені үшін алғыс білдірді.